শ্ৰীশ্ৰীসত্যনাৰায়ণ পাঁচালী
| এই পাঠ্যৰ উৎস গ্ৰন্থ বা নথি অজ্ঞাত। প্ৰামাণ্যতাৰ সবিশেষ জানিবলৈ অনুগ্ৰহ কৰি এই পাঠ্যৰ আলোচনা পৃষ্ঠা চাওক। "উৎস"ৰ অৰ্থ এই কামৰ প্ৰতিলিপি আনে বিচাৰি পাব পৰা স্থান। সাধাৰণতে ই ৱিকিমিডিয়া কমন্সত আপল'ড কৰা আৰু মুদ্ৰণ সংশোধন কৰিব পৰা মূল কামৰ স্কেন ফাইল। যদি নাই, তেন্তে এটা URL হ'লেও দিয়া উচিত; একো নাথাকিলে অনুগ্ৰহ কৰি আলোচনা পৃষ্ঠাত কাৰণ উল্লেখ কৰিব। |
- শ্ৰীশ্ৰীসত্যনাৰায়ণ নমঃ
- ধ্যানঃ-ধ্যায়েত্ সত্যং গুণাতীতং, গুণত্ৰয়সয়ন্বিতম্
- লোকনাথং ত্ৰিলোককেশং পীতাম্বৰ ধৰং হৰিম।
- ইন্দীবৰদলশ্যামং শংখচক্ৰগদাধৰম।
- নাৰায়ণং চৰ্তুব্বাহুং শ্ৰীবত্সপদভূষিতম। গোবিন্দং
- গোকুলানন্দং জগতঃ পিতৰং গুৰুম্।।
- ধ্যানঃ-ধ্যায়েত্ সত্যং গুণাতীতং, গুণত্ৰয়সয়ন্বিতম্
- পদ
- প্ৰণামোহো নাৰায়ণ দেৱ ভগৱান।
- যাহা হন্তে দুঃখীজনে পায় পৰিত্ৰাণ।।
- শিৰ নত কৰি বন্দো নাৰায়ণ প্ৰতি।
- তান দুই ভাৰ্য্যা বন্দো নাৰয়ণ প্ৰতি।
- তান দুই ভাৰ্যা বন্দো লক্ষ্মী-সৰস্বতী।।
- শ্ৰীৰাম-ৰক্ষণ বন্দো ৰাৱণ নিধন।
- হাতযোৰে প্ৰণামো মই সত্যনাৰায়ণ।।
- কলিযুগে ভগৱন্ত ভৈলা অৱতাৰ।
- দৰিদ্ৰ ব্ৰাহ্মণ হন্তে ভৈলন্ত প্ৰচাৰ।।
- পূৰ্বে কাশীপূৰে এক ব্ৰাহ্মণ আছিল।
- অতি দুঃখী দীনহীন ভক্ষাই সম্বল।।
- নিৰবধি সেই ব্ৰাহ্মণ কৰয় মাগল।
- পুত্ৰ-কণ্যা সেই মতে কৰয় পালন।।
- একদিনা সেই ব্ৰাহ্মণ ভিক্ষাহেতু যায়।
- সত্যনাৰয়ণক বাটতে লগ পায়।।
- ব্ৰাহ্মণৰ দুঃখে দুকী হৈয়া ত্ৰিদশ ঈশ্বৰ।
- সুধিলা কৈক যোৱা তুমি দ্বিজবৰ।।
- দৰিদ্ৰ ব্ৰাহ্মণ কয় ভিক্ষা হেতু যাওঁ।
- অতি দীন-হীন মই ভিক্ষা মাগি খাওঁ।
- ব্ৰাহ্মণৰ বাক্য শুনি কহে নাৰায়ণ।
- উপদেশ দিওঁ মই শুনাহা ব্ৰাহ্মণ।।
- ময়েই সত্যনাৰায়ণ কহিলোহো সাৰ।
- দৰিদ্ৰতা দূৰ হৈব মহিমা অপাৰ।।
- সাৱধানে শুনা তুমি সেৱাৰ প্ৰকাৰ।
- কহিবে লাগিলা কথা কৰিয়া বিস্তাৰ।।
- শুনি বিপ্ৰে ভক্তিভাবে আনন্দিত হৈয়া।
- দণ্ডবত্ হৈলা দিঙিত গামোছা বান্ধিয়া।।
- আজি সুপ্ৰভাত মোৰ পুহাইল ৰজনী।
- কিভাৱে কৰিম পূজা কহা চক্ৰপাণি।।
- মহাদুঃখী দাল-দৰিদ্ৰ একোনাই মোৰ।
- কিমতে সেৱিম দেৱ চৰণ তোমাৰ।।
- ঈষত্ হাঁহিৰে কয় সত্য়নাৰায়ণ।
- মম পূজায় নলগায় বহু ধন।।
- আধা কেজি তণ্ডলচূৰ্ণ একত্ৰ কৰিব।
- যথাসাধ্যে মালভোগ কলেৰে মথিব।।
- এৱাঁ-দৈ ঘৃত-মৌ-গুড় শক্তি অনুসাৰে।
- ভক্তিভাৱে অৰ্পি দিবা শুদ্ধ যে মনেৰে।।
- ইষ্ট-মিত্ৰ বন্ধু আদি আনিবা সাদৰি।
- মোহোৰ পাঁচালী শুনিবাহা কৰ্ণ ভৰি।।
- পাঁচালী প্ৰবন্ধে সবে কহিৱে কথন।
- মোহোৰ সকলো কথা কৈবা বিৱৰণ।।
- কথা শেষ হৈলে সবে ভক্তিযুক্ত হৈয়া।
- দণ্ডবতে সেৱা লৈবা মোক উদ্দ্যেশিয়া।।
- মোৰ প্ৰসাদসবে ভগাইয়া খাইব।
- যাৰ যি মনে থাকে সেইমত হইব।।
- এইৰূপে সেৱা যেবে কৰয় আমাৰ।
- মনৰ কামনা সিদ্ধি কৰিম তাহাৰ।।
- সেৱাৰ যতেক বস্তু কৰিবা সত্ত্বৰ।
- এই বুলি ভগৱন্ত ভৈলন্ত অন্তৰ।।
- হেন অদ্ভুত ৰূপ দেখিয়া সাক্ষাত।
- চহৰে ভিক্ষাক গৈলা ব্ৰাহ্মণৰ সুত।।
- যিমতে নিয়ম দিলা সত্য নাৰায়ণ।
- ভিক্ষা শেষে নিজ ঘৰে ফিৰিলা ব্ৰাহ্মণ।।
- সত্যনাৰয়ণ লগে যেন কথা ভৈলা।
- সকলো কথাক ব্ৰাহ্মণী আগে কৈলা।।
- শুনি আনন্দিত হৈল ব্ৰাহ্মণৰ নাৰী।
- সৱাৰ যতেক বস্তু যোগাইল তাৰাতাৰি।।
- আত্মীয়-বন্ধু-পাৰাবাসী আনিল ব্ৰাহ্মণ।
- গধূলিতে আৰম্ভিল সত্যৰ সেৱন।।
- এইদৰে সত্যৰ সেৱা ব্ৰাহ্মণ কৰয়।
- দৰিদ্ৰতা দূৰ হৈল অতীব ত্বৰায়।।
- অল্পদিনে বহু-ধন পাইল ব্ৰাহ্মণ।
- ধুলা চুলে সোণ হয় ঈশ্বৰ বিধান।।
- অধম ধৰিত্ৰী কহে শুনা সৰ্বজন।
- দুৰ্গতি নাশৰহেতু ভজা নাৰায়ণ।।
- একদিনা খৰিকটিয়া মিলি চাৰিজন।
- অৰণ্যত প্ৰৱেশিলা খৰিৰ সন্ধান।।
- বহুকষ্টে খৰি লৈ গধুলি ফিৰিল।
- পিয়াহত অণ্ঠ-কণ্ঠ শকাইলা গৈল।।
- কোনোমতে আহি পাইলা ব্ৰাহ্মণৰ ঘৰ।
- চোতাল আহি পায় দেখে পূজা আৰম্বৰ।।
- খৰিকটিয়া সবে বোলে ব্ৰাহ্মণৰ প্ৰতি।
- কাহাৰ পূজা দেউ কৰাহা সম্প্ৰতি।।
- কিমতেনো সেৱা হয় কহা তত্ত্বসাৰ।
- কিমতে দুৰ্গতি নাশ হৈল তোমাৰ।।
- ব্ৰাহ্মণে বোলন্ত ভাই শুনাহে বচন।
- আপদ নাশিলা মোৰ সত্য নাৰায়ণ।।
- খৰিকটিয়া বোলে কোৱাহে ব্ৰাহ্মণ।
- কিমতে দুৰ্গতি নাশ কৈলা নাৰায়ণ।।
- সৰ্বতত্ত্ব বিৱৰিয়া কহিলা ব্ৰাহ্মণ।
- ক'তো শুনা নাই এনে অপূৰ্ব কথন।।
- দৰিদ্ৰ ব্ৰাহ্মণ খুজি খাইলা ঘৰে ঘৰে।
- নাৰায়ণ সেবি সুখী ভৈলা কাশীপুৰে।।
- এইখিনি কলো মই শুনা বাই সৱ।
- কৰিবা সত্যৰ সেৱা যেহেন সম্ভৱ।।
- দৃঢ়মতি কৰি সৱে যুক্তি কৰে সাৰ।
- খৰি বেচি কৰিব সবে সত্যৰ সেৱাৰ।।
- এইসব যুক্তি কৰি চাৰিও জন।
- খৰি লৈ ঘৰে ঘৰে কৰিল প্ৰস্থান।।
- খৰি লৈ আহিলা সকলে বজাৰ।
- বেচিলা দুগুণ দৰত একো একো ভাৰ।।
- সেৱাৰ যতেক দ্ৰব্য আনিলা কিনিয়া।
- নিজ ঘৰে প্ৰবেশিলা আনন্দি হুয়া।।
- ভাৰ্য্যাৰ আগত আহি সমস্ত কহিলা।
- সেৱা সমস্ত বস্তু জোগাৰ কৰিলা।।
- ইষ্ট-মিত্ৰ বন্ধুবৰ্গ আনিলা অপাৰ।
- কবলৈ ধৰিলে কথা কৰি যে বিস্তাৰ।।
- যিৰূপে ব্ৰাহ্মণদেৱে কহিছে কথন।
- পাঁচালী প্ৰবন্ধে কহে সব বিৱৰণ।।
- কথা অন্তে সৱে ভক্তিযুক্ত হইয়া।
- দণ্ডবত্ কৈলা সৱে গলবস্ত্ৰ লৈয়া।।
- প্ৰাসাদ লভিয়া পাছে শিৰত বন্দিয়া।
- ঘৰে ঘৰে গৈলা সৱে প্ৰণাম কৰিয়া।।
- খৰিকটিয়াই এইদৰে কৰিলা সেৱণ।
- খৰিকটা এৰি পাছে পাইল বহুধন।।
- গন্ধৰ্ব সমান পুৰী হৈলেক সবাৰ।
- ঘৰবাৰী হয়-হস্তি লৈলেক অপাৰ।।
- সংক্ষেপে কৰিল পদ ধৰিত্ৰী অধম।
- ৰচিলো পাঁচালীখনি কৰিয়া যতন।।
- এইমতে কিছু দিন সেৱে সৰ্বজন।
- একমনে শুনা সবে সাধু বিৱৰণ।।
- উল্কামুখ নামে এক নৃপতি-নন্দন।
- নদী পাৰে সদা কৰে সত্যৰ সেৱন।।
- সেই নদীত সদাগৰে নাও লৈ যান্ত।
- মানুহৰ কথা শুনি নাও ৰাখিলন্ত।।
- সুধিলন্ত সদাগৰে প্ৰতি জনেজন।
- কি কাৰ্য্য কৰাহা কাহাৰ সেৱন।।
- সৱে বোলে সেৱা কৰো সত্যনাৰায়ণ।
- বহু আৰম্বেৰে সেৱে নৃপতি নন্দন।।
- পুনৰাই সদাগৰে বুলিলা বচন।
- ইয়াক সেৱিলে সিজে কোন প্ৰয়োজন।।
- যদি দৃঢ়চিত্ত কৰি সেৱে চৰণ তাহাৰ।
- সত্যৰ সম মহিমা শক্তি আছে কাৰ।।
- অপুত্ৰৰ পুত্ৰ হৱে নিৰ্ধনীৰ ধন।
- অন্ধজনে চকু পায় বন্ধ বিমোচন।।
- কামনা কৰিয়া যদি কৰয় চিন্তন।
- যিবৰ মাগে তাঙ্ক দিয়ে নাৰায়ণ।।
- পুনৰাই সদাগৰে বুলিলা বচন।
- আমাৰ কামনা এক শুনা সৰ্বজন।।
- পুত্ৰ-কন্যা মোৰ ঘৰে কিছুয়েই নভৈল।
- অপুত্ৰক কৰি মোৰ বিধিয়ে স্ৰজিল।।
- কিবা পুত্ৰ কিবা কন্যা মোৰ ঘৰে হয়।
- এহিসে তোমাৰ স্থানে কৰিলো বিনয়।।
- তেতিয়া জানিম মই দৃঢ় সত্যনাৰায়ণ।
- সুবৰ্ণ পতাকা দিয়া কৰিম সেৱন।।
- লোকে বোলে শুনা সাধু বচন আমাৰ।
- কৰা নাৰায়ণ সেৱা হৈবেক কুমাৰ।।
- পাছে সদাগৰে কামনা কৰিয়া।
- নিজপুৰে গুছি আইলা নাওত চৰিয়া।।
- সত্বৰে পাইলন্ত গৈয়া আপোন নগৰ।
- বেপাৰৰ বয়-বস্তু লৈয়া গৈল ঘৰ।।
- আনন্দিত সদাগৰ চৰ্তুদোলে চড়ি।
- পুৰে প্ৰবেশিলা চতুৰঙ্গ দলে বেঢ়ি।।
- এহিমতে ক'তো দিন আছে লক্ষপতি।
- গৰ্ভৰ লক্ষণ হৈল পত্নী লীলাৱতী।।
- কিছুদিন পিছে এক কন্যা উপজিল।
- নানা বাদ্য ভাণ্ড বজাই মঙ্গল কৰিল।।
- শিশুকাল বহি গৈল আহিল যৌৱন।
- চিন্তিব লাগিলা সাধু বিবাহ কাৰণ।।
- কাঞ্চন নগৰ পুৰি আতি অনুপাম।
- বণিককুলত জন্ম শঙ্খপতি নাম।।
- কাৰ্ত্তিক সমান ৰূপ আতি মনোহৰ।
- আদৰি আনিলা লক্ষপতি সদাগৰ।।
- অতি আৰম্বৰে বিয়া পাতিলা শঙ্খপতি।
- কাৰ্ত্তিক সম দৰা কন্যাও ৰূপৱতী।।
- সত্য সেৱা নকৰিয়া কন্যা বিয়া দিলা।
- জোঁৱাইক লগত লৈ বাণিজ্যে চলিলা।।
- সন্মুখে দেখিলা এক ৰজাৰ নগৰ।
- সেই ৰাজ্যে নাও লগাইলা সদাগৰ।।
- সেই ঠায়ে বাসগৃহ কৰিয়া নিৰ্মাণ।
- বেচিব-কিনিব তাত পাতিলা দোকান।।
- তাহাতে কুপীত হৈল সত্যনাৰায়ণ।
- কামনা হইয়াছে সিদ্ধি নকৰে সেৱন।।
- চোৰ পঠাই দিলে ৰাজ অন্তঃপুৰে।
- ৰজাৰ সমস্ত ধন চুৰি কৈলা চোৰে।।
- সোণ-ৰূপ মণি-মুক্তা যিমান আছিল।
- সমস্ত কৰিলা চুৰি একো নাৰাখিল।।
- ৰাজ চৌকিদাৰ ভয়ে কম্পে থৰে থৰে।
- চোৰাংচোৱা ৰূপ ধৰি ফুৰিল বাজাৰে।।
- বিচাৰি বিচাৰি যেবে চোৰক নাপায়।
- অন্তৰিক্ষে নাৰায়ণ হইয়া সদয়।।
- গুণ গুণ বোলে পাছে সত্য নাৰায়ণ।
- সদাগৰে চুৰি কৰি পাতিছে দোকান।।
- আকাশবাণী শুনি চোৰাংচোৱা প্ৰফুল্লিহুয়া।
- সদাগৰে কাষে গৈলা শীঘ্ৰগতি ধায়া।।
- শহুৰ-জোঁৱাই দুইকো একত্ৰে বান্ধিয়া।
- সমজাই দিলে গৈ ৰজাৰ কাষত নিয়া।।
- কূপীত হৈল যে ৰাজ্যৰ ঈশ্বৰ।
- বন্দি কৰি ৰাখা হৈ দ্বাদশ বত্সৰ ।।
- দাৰুণ কটোৱালে ৰাজআজ্ঞা পায়।
- পোতাশালত পেলাই থৈল শহুৰ-জোঁৱাই।।
- এই মতে সদাগৰে দ্বাদশ বত্সৰ।
- কান্দি কান্দি বাস কৰে জেলৰ ভিতৰ।।
- বাৰ বছৰ লীলাৱতী কি কৰি চলিল।
- সমস্ত সম্পত্তি বেচি দৰিদ্ৰ হইল।।
- পৰিধান বস্ত্ৰ আৰু যত ধন-সোণ।
- সকলো বেচি দিলে নাথাকিল অকন।।
- সুধি ফুৰে লীলাৱতী প্ৰিত জনে জনে।
- কতো খবৰ নাপায় কান্দে দুঃখ মনে।।
- পাছে দাসী কাম কৰি যি পায় মজুৰী।
- তাকে খায় দিন কাটে আতি কষ্ট কৰি।।
- এক দিনা প্ৰভাততে সদাগৰ নাৰী।
- মজুৰী হেতু গৈয়া পাইলা ব্ৰাহ্মণৰ বাৰী।।
- দেখে বিপ্ৰ বহি আছে সত্যৰ সেৱনে।
- হাতযোৰে সুধিলে ব্ৰাহ্মণৰ স্থানে।।
- প্ৰসাদ লভিয়া তবে শিৰত বন্দিয়া।
- কহিতে লাগিলা কান্দিয়া কান্দিয়া।।
- স্বামী-জোঁৱাই নাপাও যাৱত।।
- কাতৰ দেখিয়া তবে বুলিলা ব্ৰাহ্মণ।
- একচিত্তে পূজা গৈ সত্যনাৰায়ণ।।
- যদি কৃপযুক্ত হয় প্ৰভু তোমাৰ উপৰ।
- স্বামী-জোঁৱাই আহি পাব তব ঘৰ।।
- এইমতে উপদেশ দিলন্ত ব্ৰাহ্মণ।
- দণ্ডৱত্ কৰি গৈলা আপোনা ভবণ।।
- ঘৰে আহি কলাবতী কহয় উত্তৰ।
- দেখিলো ব্ৰাহ্মণৰ কাৰ্য্য অবধান কৰ।।
- এক অদ্ভূত আমি দেখিলো নয়নে।
- সত্যনাৰায়ণ সেৱে ব্ৰাহ্মণ সজ্জনে।।
- কলিযুগে সত্যনাৰয়ণ অৱতাৰ।
- যেই যি কামনা কৰে সিদ্ধিহোৱে তাৰ।।
- আমিও কামনা কৰিলো তাসম্বাক।
- স্বামী ও জোঁৱাই ফিৰি আহক গৃহক।।
- যাৱত শৰীৰে মোৰ থাকয় জীৱন।
- তাৱত কৰিম সেৱা সত্যনাৰায়ণ।।
- এই কথা গৃহে সৱে শুনিলা শ্ৰবণে।
- কৰিব সত্যৰ সেৱা আতি ৰঙ্গমনে।।
- মায়ে-জীয়ে দুইজনী ভীক্ষাত চলিল।
- সত্যনাৰয়ণ প্ৰভু মনতে ভাবিল।।
- পাইলা বহুতো দ্ৰব্য কি কহিব আৰ।
- দিন অৱসানে আহিল নিজ ঘৰ।।
- সেৱাৰ ব্যৱস্থা কৈলা যিহয় উচিত্।
- বন্ধু-মিত্ৰ আনিলা কুল পুৰোহিত।।
- কৰিলা সেৱন বহু হইয়া ব্যগ্ৰতা।
- লীলাবতী কলাবতী জননী দুহিতা।।
- প্ৰসাদ ভগাই দিলা প্ৰতি জনে জনে।
- ভকত বত্সল প্ৰভু দয়া হৈল মনে।।
- কেদাৰ মানিক্যপুৰে ৰজা সত্যবান।
- স্বপ্নত কহিলা গৈয়া তাৰ বিদ্যমান।।
- সুখনিদ্ৰাত ৰজা সুতিয়া আছন্ত।
- ব্ৰাহ্মণৰ বেশে প্ৰভু স্বপ্ন-দেখাইলন্ত।।
- উঠ উঠ সত্যবান ক'ত নিদ্ৰা যাস।
- মই সত্যনাৰায়ণ চকু মেলি চাস।।
- লক্ষপতি-শঙ্খপতি দুই সদাগৰ।
- বন্দিকৰি ৰাখি আছা দ্বাদশ বছৰ।।
- ৰাজ্যৰক্ষা প্ৰাণৰক্ষা চোৱা নৃপবৰ।
- আতি শীঘ্ৰে এৰি দিয়া মোহোৰ নকৰ।।
- স্বপ্ন দেখি প্ৰভাততে উঠি নৃপমণি।
- চৰক নিৰেখি ৰাজা বুলিলন্ত বাণী।।
- শুনা শুনা কঠোৱালে সত্বৰে চলিলা।
- সাধু বিদ্যামানে আহি সকলো কহলা।।
- কথা শুনি আনন্দিত সাধুৰ নন্দন।
- ৰজাৰ কাষত গৈলা আনন্দিত মন।।
- ৰজা বোলে শুনা সাধু বচন আমাৰ।
- কোনৰাজ্যে থাকা কি নাম তোমাৰ।।
- সাধু বোলে ৰত্নপুৰে আমাৰ বসতি।
- বণিক কুলত জন্ম নাম লক্ষপতি।।
- বাণিজ্য কৰিব আইলু তোমাৰ নগৰ।
- শঙ্খপতি নামে এই জোঁৱাই আমাৰ।।
- সাধুৰ বচনে লজ্জাপায় নৰপতি।
- নাপিত আনায়া ক্ষৌৰ কৰা হে সম্প্ৰতি।।
- তেল আদি গাৱে দিয়া স্নান কৰাইলা।
- দিব্য অন্ন পালে দুইকো ভোজন কৰাইলা।
- ৰাজ্য বিদ্যমানে তেৱে সাধুৰ নন্দন।
- আজ্ঞা পাইলা নিজদেশে কৰিব গমন।।
- কটোৱালে বোলে গুণ ভাণ্ডাৰী বচন।
- নাও ভৰি দিয়া গৈ যত লাগে ধন।।
- পূৰ্বৰ যতেক ধন নিয়াজ লুটিয়া।
- শীঘ্ৰ কৰি দি আহা নাৱত ভৰিয়া।।
- এই আজ্ঞা শুনি ধন তুলিলা নাৱত।
- ৰাজাক প্ৰণাম কৈলা ভুমিত পৰিয়া।
- সম্ভাষ কৰিলা ৰাজা যোৰহাত হৈয়া।।
- গলে ধৰি সত্যবান বুলিলা সাধুৰে।
- নজানিয়া দুঃখ দিলো ক্ষমা কৰ মোৰে।।
- সাধু বোলে তুমি মহাৰাজা ৰাজেশ্বৰ।
- তব কিবা দোষ কৰ্মফল মোৰ।।
- আলিঙ্গনে আহ্লাদিত লভি নৰপতি।
- নিজ ঘৰে চলিলা সঙ্গত শঙ্খপতি।।
- দ্বিজ ধৰিত্ৰী কয় শুনা সৰ্বনৰে।
- এই ৰূপে দেখা দেন্ত সেৱকৰে।।
- নাওত বহি হৰি হৰি কয় সদাগৰ।
- শীঘ্ৰগতি নাও চলে দেশক যাইবাৰ।।
- মধ্য হ্ৰদত গাধুই কিছু মাত্ৰ খায়।
- দিন-ৰাতি ভেদে নাও চলি যায়।।
- নক্ষত্ৰ সঞ্চাৰ যেন নাওৰ চলন।
- দেখিয়া কুপীত ভৈলা সত্য নাৰায়ণ।।
- শীঘ্ৰ বেগে নদী তীৰে কৰিলা গমন।
- সন্ন্যাসীৰ বেশে প্ৰভু দিলা দৰশন।।
- সন্ন্যাসী দেখয় নাও যায় আথে-বেথে।
- ধাউ গেৰি দিলা প্ৰভু ত্ৰিলোকৰ নাথে।।
- কি ভাড়া ভৰি নিয়া কহিয়ো সত্ত্বৰে।
- ত্ৰিদশ ঈশ্বৰ প্ৰভু সুধিলা সদাগৰে।।
- সত্যৰ কপটে তাৰ বুদ্ধি নাশ ভৈলা।
- বন-লতা ভৰি আনিছো বুলিলা।।
- যি বুলিলা সেয়ে হৌক বোলে নাৰায়ণে।
- বন-লতা হৈ গ'ল নাওৰ ধন-সোণ।।
- কিছু দূৰে সদাগৰ নাওলৈয়া গৈল।
- ভাৰি বস্তু নাই নাও ভাসিয়া উঠিলা।।
- বজ্ৰাঘাত পৰিল তাহাৰ যেন মুণ্ডে।
- স্তব্ধ হৈলা সদাগৰ বাক্য নাই তুণ্ডে।।
- নাও লৈ সদাগৰ সমুদ্ৰৰ কোলে।
- ডাণ্ডি-মাঝি পাইক সবে কান্দে উচ্চ ৰোলে।।
- হাহাকাৰ শব্দ কৰি সুমৰে গোসাই।
- গলাগলি কৰি কান্দে শহুৰ-জোঁৱাই।।
- বজ্ৰঘাত শব্দ যেন নোলায় বচন।
- পৰিল ভূমিত সাধু হইয়া অচেতন।।
- কান্দিয়া কান্দিয়া স্থিৰ ভৈলা সদাগৰ।
- শঙ্খপতি বোলে পাছে যুৰি দুই কৰ।।
- আমি নিবেদন কৰো শুনা মহামতি।
- আমাৰ বচন যদি কৰা আবগতি।।
- এই যে সন্ন্যাসী বহি আছে নদী তীৰে।
- শীঘ্ৰগতি চলি যাও তাহাৰ গোচৰে।।
- জোঁৱাইৰ বচনে সাধু সত্বৰে চলিল।
- সন্ন্যাসীৰ আগে আহি দণ্ডৱত্ত কৈল।।
- কোন দেৱ হোৱা তুমি কোন আৱতাৰ।
- কোন দোষে সৰ্বনাশ কৰিলা আমাৰ।।
- চৰণে ধৰিয়া বোলে বণিক নন্দন।
- কৃপা কৰা প্ৰভু মই পশিলো শৰণ।।
- সত্যনাৰায়ণ বোলে শুনা লক্ষপতি।
- কিহেতু কৰা তুমি এনেকৈ কাকূতি।।
- মই কি কৰিব পাৰো বুলিলা বচন।
- সাধু বোলে বনলতা হৈলা সব ধন।।
- ঈষত্ হাঁহি বোলে সত্যনাৰায়ণ।
- পূৰ্ব কথা তব কিবা হোৱয় স্মৰণ।।
- উল্কামুখ নামে মায়া নদী তীৰে।
- তাহাৰ সমীপে নাও ৰাখিয়া সত্বৰে।।
- সোধাহা তোমা সবে কৰা কাহাৰ সেৱণ।
- খৰিকটাই বোলে সেৱো সত্যনাৰায়ণ।।
- আমিও সেৱিবো সত্যনাৰায়ণ চৰণে।
- তাহাতে কামনা কৰি গৈলাহা ভবণে।।
- পুত্ৰ-কন্যা যদি মোৰ কিছু মাত্ৰ হয়।
- সুবৰ্ণ পতাকা দিয়া সেৱিবো নিশ্চয়।।
- বৰ দিলো কন্যা হৈল বিয়া দিলা তাৰে।
- কত দুঃখ ৰৈ গ'ল আমাৰ অন্তৰে।।
- বন্দিশালে দুঃখ দিলো দ্বাদশ বছৰ।
- তেবে লীলাবতী সেৱে মোক নিৰন্তৰ।।
- প্ৰসন্ন হুয়া পিছে মই দিলো বৰ।
- বৰ মাগে লীলাৱতী যুৰি দুই কৰ।।
- কন্যা বোলে সাধু সঙ্গে জোঁৱাইক আহক।
- সিকাৰণে স্বপ্ন মই দেখাইলো ৰজাক।।
- প্ৰবন্ধে এৰাইলো মই কহিলো তোমাৰে।
- পূৰ্ব কথা স্মৰণ কৰাইলো নিৰন্তৰে।।
- নাও মেলি দেশত যাৱ পৰম হৰিষে।
- কৌতুক দেখাইতে আইলু সন্ন্যাসীৰ বেশে।।
- কপটে হৰিয়া ধন দিলো বনলতা।
- শুনিয়ো কহিলো মই সব সত্য কথা।।
- এতেকে কহিলা যদি সত্য নাৰায়ণ।
- পূৰ্বৰ বৃত্তান্ত সাধু কৰিলা স্মৰণ।।
- গলে বস্ত্ৰ লৈ বোলন্ত সদাগৰ।
- লক্ষ মুদ্ৰা বন্ধ গৈল তোমাৰ গোচৰ।।
- গৃহে গৈয়া প্ৰথমতে কৰিবো সেৱন।
- হেনকালে ঈশ্বৰ আহি কৰিল কথন।।
- ঘাটে আইলা সদাগৰ ধন মান লৈয়া।
- সত্বৰে জানাইল সদাগৰ ঘৰে গৈয়া।।
- জোঁৱাই আহিল বুলি ৰঙ্গভৈল মনে।
- কলাৱতী প্ৰসাদক থৈলা সেহি স্থানে।।
- ত্বৰিত গমনে গৈলা অঙ্গৰ সাজনী।
- স্বামীক দেখিব যায় খ়্জন গামিনী।।
- শুভধ্বণী সাধুৰ শুনিলা লীলাৱতী।
- প্ৰসাদ নাখায়া গৈলা যথা নিজপতি।।
- তাতে সত্যনাৰয়ণ পাইলেক চল।
- শঙ্খপতি সাধুৰ নাও ঘাটে গৈলা তল।।
- ভাহিলা বাসতে যেবে চাহিলা সদাগৰ।
- জোঁৱাই নেদেখি সাধু হৈলা শোকাতুৰ।।
- জোঁৱাই জোঁৱাই বুলি মাতে ঘনে ঘন।
- ভূমিত পৰিল সাধু হৈলা অচেতন।।
- ধৰিত্ৰী বোলয় সাধু নকৰা হাহাকাৰ।
- অৱশ্যে পাইবা জোঁৱাই ধন তোমাসাৰ।।
- ছবি।।
- জোঁৱাইক মনে স্মৰি কত গৈলা মোক এৰি
- কান্দে সাধু কৰিয়া বিষাদ
- নানা ৰত্নে ভৰা তৰি অবিলম্বে আহা ঘূৰি
- তাতে হেনো মিলিল প্ৰমাদ।।
- কলাৱতী কোলে কৰি পৃথিৱীত গড়াগৰি
- কান্দে সাধু বিষাদ কৰিয়া
- কলাৱতী বোলে বাপ শৰীৰে নসহে তাপ
- পোৰে প্ৰাণ প্ৰভুক নেদেখিয়া।।
- মাৱে-জীৱে গলাগলি কান্দয় বিলাপ কৰি
- কোন হেতু অকাল মৰণ
- কলাৱতী কয় মাৱ তোমাসৱে ঘৰত যোৱা
- মই ইয়াত ত্যেজিম জীৱন।।
- কন্যাৰ কাৰুণ্য দেখি লীলাৱতী বোলে বাণী
- স্থিৰ হোৱা নকৰা ৰোদন
- দ্বিজ ধৰিত্ৰী বোলে নাৰয়ণ পদতলে
- জীৱ তব বণিক নন্দন।।
- জোঁৱাইক মনে স্মৰি কত গৈলা মোক এৰি
- পদ।।
- য়েতিয়া আছিল প্ৰভু দেশৰ অন্তৰে।
- দেশত আহি নাও-তল পালেঙৰ উপৰে।।
- মনত ভৰষা পালো সাধু আহিল দেশে।
- চকু মেলি নেদেখিলো প্ৰাণ পতিতে সে।।
- পাপকৰ্ম হেতু হেন পক্ষ হুয়া যাওঁ।
- কত গৈলা প্ৰাণপতি ক'ত লগ পাওঁ।।
- মই অভাগিণী খণ্ডব্ৰত আচৰিলো।
- তাৰ ফলে অবিলম্বে তোমাক নাশিলো।।
- কন্যাৰ লগত কান্দে ৰাণী লীলাৱতী।
- ভূমিত পৰিয়া কান্দে সাধু লক্ষপতি।।
- ইমত দাৰুণবিধি কিহেতু কৰিল।
- আনন্দৰ মাজে বৰ প্ৰমাদ ঘটিল।।
- মাথে হাত দিয়া কান্দে বণিক নন্দন।
- অন্তৰিক্ষে থাকি মাতে সত্যনাৰায়ণ।।
- নাকান্দা নাকান্দা সাধু স্থিৰ কৰা মতি।
- তোমাৰ কন্যাৰ দোষে এই ভৈলা গতি।।
- কলাৱতী পেলাইছে প্ৰসাদ আমাৰ।
- সেহি হেতু মৰি আছে জোঁৱাই তোমাৰ।।
- পানী হন্তে উপজিব কৈলো সত্য বাণী।
- প্ৰসাদ খাওক গৈয়া তোমাৰ নন্দিনী।।
- আমাৰ প্ৰসাদ কন্যা নাখাব যাৱত।
- সত্য কলো তান পতি নিজীৱ তাৱত।।
- আকাশী বচন শুনি চমকিত মন।
- কৰ যুৰি মাতিলন্ত সাধুৰ নন্দন।।
- অধমক কৃপা কৰা সত্যনাৰায়ণ।
- লক্ষ ধন দিয়া মই কৰিমে সেৱন।।
- এহি বুলি প্ৰসাদ আনিলা লক্ষপতি।
- আজ্ঞা হইল প্ৰসাদ খাওক কলাৱতী।।
- এই শুনি কলাৱতী প্ৰসাদ ভুঞ্জিলা।
- সত্বৰে স্বামীৰ ডিঙা ভাসিয়া উঠিলা।।
- মঙ্গল কৰিলা লক্ষপতি সদাগৰ।
- জোঁৱাই-শহুৰ আহিলা নিজ ঘৰ।।
- শহুৰ-জোঁৱাই দুয়ো একত্ৰ যে হুয়া।
- নাওৰ যতেক ধন আনিলা তুলিয়া।।
- লক্ষ মুদ্ৰা ভাঙি সেৱে সত্য নাৰায়ণ।
- সুবৰ্ণ পতাকা দিলে আতি বিতোপণ।।
- শহুৰ-জোঁৱাই দুয়ো পুৰে প্ৰবেশিলা।
- সাধুৰ সেৱাত প্ৰভু বৰ তুষ্ট ভৈলা।।
- ভক্তিভাবে এই ৰূপে সেৱে যিবাজন।
- ধনে-ধানে পুত্ৰ-পৌত্ৰে বাঢ়ে সৰ্বক্ষণ।।
- কামনা কৰিয়া যেবে সেবে চিৰকাল।
- সত্যৰ প্ৰসাদে তাৰ গুঠে আহুকাল।।
- ইঙ্গিত কৰয় যেবা অৱজ্ঞা কৰিয়া।
- অঞ্চলে অগণি বান্ধি মৰিব পুৰিয়া।।
- পাৱয় পৰম পদ সেৱি নাৰায়ণ।
- অপুত্ৰৰ পুত্ৰ হোৱে নিৰ্ধনীৰ ধন।।
- অন্ধজনে দৃষ্টি পায় বন্ধ বিমোচন।
- হেন জানি নেৰিবাহা সত্যৰ সেৱণ।।
- যিবা শুনি যিবা পঢ়ে সত্যৰ পাঁচালী।
- সংসাৰ ত্যেজিয়া যায় বিষ্ণুপুৰী।।
- হেন জানি নৰলোক এৰি আন কাম।
- ভজিয়ো সত্বৰে প্ৰভু সত্যৰ চৰণ।।
- কলি যুগে আন ধৰ্মে নপাৱয় গতি।
- সত্যনাৰায়ণ নাম ঘুষিয়ো সম্প্ৰতি।।
- সমাপ্ত