স্যমন্তক হৰণ
- ।।শ্ৰী শ্ৰী কৃষ্ণায় নমঃ।।
- স্যমন্তক হৰণ
- ।।শ্লোক।।
- শ্ৰী কৃষ্ণায় বাসুদেৱায় দৈৱকীনন্দনায় চ,
- নন্দগোপকুমাৰায় গোবিন্দায় নমো নমঃ।।
- নমঃ পঙ্কজনাভায় নমঃ পঙ্কজমালিনে।
- নমঃ পঙ্কজনেত্ৰায় নমস্তে পঙ্কজাঙ্ঘ্ৰয়ে।।
- বসুদেৱসুতং কৃষ্ণং কংস-চানুৰমৰ্দ্দনম্।
- দৈৱকীপৰমানন্দং কৃষ্ণং বন্দে জগতগুম।।
- হৰি ৰাম ৰাম ৰাম।।
- মুকং কৰোতি বাচালং পঙ্গুং লঙ্ঘয়তে গিৰিং।
- যত্কৃপা তমহং বন্দে পৰমানন্দমাধৱং।।
- ঘোষা।।
- ভাই মুখে বোলা ৰাম হৃদয়ে ধৰা ৰূপ।
- এতেকে মুকুতি পাইবা কহিলো স্বৰূপ।।
- পদ।।
- শুক মুনি বোলন্ত শুনিয়ো পৰীক্ষিত।
- কৃষ্ণক কলঙ্ক দিয়া ডৰি সত্ৰাজিত।।
- আপোনাৰ কন্যা আনি দিলেক কৃষ্ণক।
- স্যমন্তক মণি দিলা লগত যৌতুক।।
- শুকত সোধন্ত দুনাই ৰাজা পৰীক্ষিত।
- দিলা কিবা কলঙ্ক কৃষ্ণক সত্ৰাজিত।।
- কৈত পাইল স্যমন্তক মণি মহাৰত্ন।
- কিহেতু কৃষ্ণক কন্যা দিলে কৰি যত্ন।।
- শুক নিগদতি শুনিয়োক পৰীক্ষিত।
- সূৰ্য্যৰ পৰম ভক্ত সখা সত্ৰাজিত।।
- তুষ্ট হৈয়া সূৰ্য্যে স্যমন্তক তাঙ্ক দিলা।
- সত্ৰাজিতে মহামণি কণ্ঠত পিন্ধিলা।।
- সূৰ্য্য যেন প্ৰকাশিয়া আসৈ দ্বাৰকাক।
- ৰশ্মিয়ে চক্ষুক পীড়ৈ দেখি প্ৰজা-জাক।।
- আসন্ত আদিত্য বুলি মনত শঙ্কিয়া।
- কৃষ্ণৰ পাশক সৱে যায় লৱৰিয়া।।
- সভাত খেলন্ত পাশা প্ৰভু পীতাম্বৰ।
- আথে-বেথে দেয় জান প্ৰজা নিৰন্তৰ।।
- নমো নাৰায়ণ শঙ্খ- চক্র -গদাধৰ।
- অৰৱিন্দলোচন গোৱিন্দ দামোদৰ।।
- তোহ্মাক দেখিবে লাগি ত্ৰিজগত পতি।
- আসন্ত আদিত্য হেৰা দেখিয়ো সম্প্ৰতি।।
- সৱাৰো চক্ষুক পীড়ি আসৈ ৰশ্মি-জালে।
- তোহ্মাক অন্বেষ কৰে দশদিগপালে।।
- পুৰাণ পুৰুষ তুমি সনাতন হৰি।
- যদু-কুলে অৱতৰি আছা ছদ্ম কৰি।।
- তাতেসে আসন্ত সূৰ্য্যে দেখিবে তোহ্মাক।
- বোলা হৰি হৰি উদ্ধাৰিয়ো আপোনাক।।
- ঘোষা।।
- গোপাল গোৱিন্দ যদুনন্দন।
- কৃষ্ণৰ চৰণে লৈলো শৰণ।।
- পদ।।
- শুনিয়া হাসি চাইলা চক্রপাণি।
- নোহন্ত আদিত্য বুলিলা বাণী।।
- মণিৰ ৰশ্মি হুয়া প্ৰকাশিত।
- গৃহক লাগি আসৈ সত্ৰাজিত।।
- সত্ৰাজিত পাছে গৃহক আইলা।
- অনেক মাঙ্গল্য-বাদ্য বজাইলা।।
- দেৱৰ গৃহে পশি প্ৰণিপাতে।
- নিবেদিলা মণি বিপ্ৰৰ হাতে।।
- মণিৰ মহিমা কি কৈবো আৰ৷।।
- সুৱৰ্ণ নিতে স্ৰৱে অষ্ট ভাৰ।।
- যি থানে থাকৈ সিটো স্যমন্তক।
- নাহিকে দুৰ্ভিক্ষ মাৰিমৰক।।
- নাহিকে ব্যাধি ব্যাঘ্ৰ সৰ্পভয়।
- একো উপসৰ্গ নুপজে তয়।।
- দিনেক মণি খুজিলন্ত হৰি।
- নিদিলা সত্ৰাজিতে গহ কৰি।।
- প্ৰসেন নামে তাৰ ভ্ৰাতৃ আছে।
- কণ্ঠত মণিক পিন্ধিলা পাছে।।
- ঘোড়াত চড়ি মহাৰঙ্গ মনে।
- মৃগক মাৰি ফুৰৈ বিজুবনে।।
- দেখি সিংহে তাক নখে বিদাৰি।
- ঘোড়ায়ে সহিতে পেহ্লাইলা মাৰি।।
- কণ্ঠৰ মণিক ছিণ্ডিয়া লই।
- চড়িল গিৰি শৃঙ্গে সিংহ গই।
- দেখি জাম্বৱন্ত বীৰ বিড়িঙ্গ।।
- লৈলন্ত মণিক মাৰিয়া সিংহ।
- স্যমন্তক মণি গৰ্ত্তক নিলা।।
- ওমলাইবে লাগি শিশুক দিলা।।
- বিচিত্ৰ মণিগোট ধৰি ধাই।
- বাটত ফুৰে শিশু ওমলাই।।
- কৃষ্ণৰ কিঙ্কৰে কহে শঙ্কৰে।
- বোলা হৰি হৰি সমস্ত নৰে।।
- ঘোষা৷৷
- বনমালী এ জগমোহন ৰাম।
- সুখে দুখে মুখে জোনো ছাড়ে ৰাম নাম।।
- পদ৷৷
- ভ্ৰাতৃক নেদেখি অনন্তৰে সত্ৰাজিত।
- মহাশোকে ক্রন্দন কৰিলা বিপৰীত।।
- স্যমন্তক পিন্ধি গৈলা বনক ভৈয়াই।
- জানিলো মাৰিলে কৃষ্ণে নিৰ্জ্জনত পাই।।
- খুজি নপাই ভাইক মাৰি কৃষ্ণে নিলা মণি।
- শুনি সৰ্ব্বলোকে আক কৰে কণাকণি।।
- বেকত নকৰে কেহো মাধৱক ডৰে।
- পাইলেক কলঙ্ক মোক জানি দামোদৰে।।
- কিমতে দুৰ্যশ গুচাওঁ গুণি ভগৱন্ত।
- লগে লৈয়া নগৰীয়া সেনা অপৰ্য্যন্ত।।
- প্ৰসেনৰ পথে চলি যান্ত বনমালী।
- প্ৰবন্ধে ঘোঁড়াৰ সিটো খোজক নিহালি।।
- কতো দূৰ গৈয়া পাছে দেখিলা মহীত।
- প্ৰসেন পড়িয়া আছে ঘোঁড়ায়ে সহিত।।
- সিংহে মাৰি মণি নিলা জানি বনমালী।
- উঠিলা পৰ্ব্বতে তাৰ খোজক নিহালি।।
- মৰি পড়ি আছে সিংহ দেখিলা মুৰাৰি।
- জানিলা ভালুকে মণি নিলে আঙ্ক মাৰি।।
- দেখি সৰ্ব্বজন ভৈলা মনত নিঃশঙ্ক।
- মিছাতে পাইলন্ত কৃষ্ণে দাৰুণ কলঙ্ক।।
- খোজ গুড়ি ভালুকৰ গৰ্ত্ত পাইলা হৰি।
- ঘোৰ অন্ধকাৰে আছে গৰ্ত্তক আৱৰি।।
- দেখি সেনাগণ সৱে বাহিৰত থৈই।
- একেশ্বৰে গৰ্ত্তে কৃষ্ণ প্ৰৱেশিলা গই।।
- তথাত মণিক কৃষ্ণে দেখিলন্ত পাছে।
- হাতে লৈয়া ধাই শিশু ওমলান্তে আছে।।
- কাঢ়ি লৈবে লাগি হৰি সমীপ চাপিলা।
- হেন দেখি ভয়ে ধাই ধাউ-গেড়ি দিলা।।
- কোথাৰ মনুষ্য গোটে মণি নেই হৰি।
- আৱে ঋক্ষৰাজ লাগ লোৱা ঝান্ত কৰি।।
- এহি বুলি ধাই আতি কৰে আৰ্ত্তনাদ।
- বোলা হৰি হৰি ছাড়া বিষয়-বিষাদ।।
- ঘোষা।।
- ৰাম কৃষ্ণ গোপাল।
- ত্ৰাহি হৰি কৃপাল।।
- পদ।।
- হেন শুনি জাম্বৱন্ত।
- ধাইলা মহা বলৱন্ত।।
- নিচিনি স্বামীক পাছে।
- ধৰিলন্ত যুদ্ধ কাছে।।
- সামান্য মনুষ্য বুলি।
- মহাক্রোধে গৈলা জ্বলি।।
- নজানি প্ৰভাৱ আতি।
- লগাইলেক হতাহতি।।
- দুয়ো হুয়া মহা ত্ৰুদ্ধ।
- লগাইলেক ঘোৰ যুদ্ধ।।
- দুয়ো মাতঙ্গৰ লীলা।
- বৰিষে পৰ্ব্বত শিলা।।
- কতো বেলি হানে গাছ।
- কতো কোপে চাপে কাছ।।
- যুজিলন্ত মালবান্ধে।
- ধৰি ভৰি ভৰি ছান্দে।।
- দুইকো দুইৰো নাহি তুষ্টি।
- হানৈ বজ্ৰ সমমুষ্টি।।
- মাংসৰ কাৰণে যেন।
- যুজন্ত দুগোটা শেন।।
- কেহো বলে নুহি ক্ষীণ।
- যুজন্ত আঠাইশ দিন।।
- কৃষ্ণৰ প্ৰহাৰ পাই।
- পাছে মহা ঋক্ষৰায়।।
- শ্ৰান্ত ভৈলা মহা দুঃখে।
- নিশ্বাস বজাইলা মুখে।।
- ভাগে যেন কটি স্কন্ধ।
- শৰীৰৰ ছিণ্ডে বান্ধ।।
- গোড়ে ঘৰ্ম্ম যায় বহি।
- ক্ষণেক স্তম্ভিলা ৰহি।।
- সমস্ত সমাজে ঢাকি।
- হৰি হৰি বোলা ডাকি।।
- ঘোষা।।
- ত্ৰাহি দেৱ দামোদৰ যাদৱানন্দ
- দীন দয়াশীল স্বামী।
- কৰাহা নিস্তাৰ তোমাৰ চৰণে
- শৰণ পশিলোঁ আমি।।
- ত্ৰাহি দেৱ দামোদৰ যাদৱানন্দ
- পদ৷৷
- কৃষ্ণৰ বিক্রম দেখি ঋক্ষৰাজ
- পৰম বিস্ময় মনে।
- স্বামী হেন জানি বুলিবে লাগিলা
- প্ৰণামি কৃষ্ণ চৰণে।।
- জানিলো তোমাক জগত ঈশ্বৰ
- তুমি সনাতন হৰি।
- সমস্ত ভূতৰ তুমি প্ৰাণবল
- জগতকে আছা ধৰি।।
- স্ৰষ্টাৰো স্ৰষ্টা তুমি সৰ্ব্ব-দ্ৰষ্টা
- উদ্ধাৰি ধৰিলা ভূমি।
- জীৱৰ নিয়ন্তা পৰম আত্মা
- মৃত্যুৰো অন্তক তুমি।।
- জানিলো তোমাক সেহি ৰঘুনাথ
- যিটো ইষ্টদেৱ মোৰ।
- সীতাৰ সন্তাপে জগতৰ বাপে
- কৰিলা পয়াণ ঘোৰ।।
- যাৰ মহাক্রোধে কটাক্ষতে গ্ৰাসে
- সাগৰে কল্লোল কৰে।
- লঙ্কাক লাগিয়া মাজে বাট দিলা
- ডৰিয়া আতি সাগৰে।।
- জানকীৰ হেতু বান্ধিলাহা সেতু
- দহিলা লঙ্কা নগৰী।
- ৰাৱণৰ মাথ কাটিলাহা নাথ
- আনিলা সীতা উদ্ধাৰি।
- আগে নিছিনিলো আৱেসে জানিলো
- তেন্তে তুমি শ্ৰীৰাম।।
- অজ্ঞানীক মোক প্ৰভু ক্ষমিয়োক
- চৰণে কৰো প্ৰণাম।
- এতেক বুলিয়া নমি জাম্বৱন্ত
- আছে কৃতাঞ্জলি কৰি।।
- শুনা সৰ্ব্বজন নেৰিবা কীৰ্ত্তন
- ডাকি বোলা হৰি হৰি।
- কৃষ্ণৰ বিক্রম দেখি ঋক্ষৰাজ
- ঘোষা।।
- হৰিৰ চৰণ চিন্তিয়ো চিত্ত হৃদয়ে সৰ্ব্বথা।
- মুখে ৰাম বোলা কৰ্ণে শুনা কৃষ্ণ-কথা।।
- পদ।।
- হেন স্তুতি বাণী শুনি দৈৱকী-তনয়।
- চাইলা দয়া-দৃষ্টি ভকতক কৃপাময়।।
- মাৰ্জিলা অমৃত-হাতে সমস্ত শৰীৰ।
- ভৈলন্ত নিৰুজ জাম্বৱন্ত মহাবীৰ।।
- মেঘৰ গম্ভীৰ ধ্বনি দিলা সমিধান।
- মণি হেতু ঋক্ষৰাজ আইলো তযু স্থান।।
- তুমি আনি আছা মহামণি স্যমন্তক।
- মিছাতে সমস্তে দেয় আমাক কলঙ্ক।।
- পৰম ভকত তুমি জানোহো তোমাক।
- দিয়া মণি মোক মই নেওঁ দ্বাৰকাক।।
- গুচোক দুৰ্যশ দেখাওঁ লোকত প্ৰত্যয়।।
- শুনি আনন্দিত জাম্বৱন্ত মহাশয়।
- তানে কন্যাৰত্ন আছে নামে জাম্বৱতী।।
- কৃষ্ণক বিৱাহ দিলা ৰঙ্গে ঋক্ষপতি।
- লগত যৌতুক আনি দিলন্ত স্যমন্ত।।
- পৰম আনন্দ দেখি ভৈলা ভগৱন্ত।
- গৰ্ত্তৰ বাজত যত প্ৰজা আছে ৰহি।।
- কৃষ্ণক চাহন্তে বাৰ দিন গৈল বহি।
- নাসিবাৰ দেখি ভৈলা পৰম দুঃখিত।।
- নিৱৰ্ত্তিয়া জান দিলা দ্বাৰকাপুৰীত।
- গৰ্ত্তক পশিল মণি-হেতু যদুৰায়৷।।
- বাৰ দিন তথাতে আছিলো বাট চাই।
- উলটি নাসিল কৃষ্ণ কিবা অথন্তৰ।।
- বোলা হৰি হৰি তৰা সংসাৰ-সাগৰ।
- ঘোষা।।
- ত্ৰাহি যদু-নন্দন দেৱ।
- পাৱে পৰি মঞি কৰোঁ সেৱ।।
- পদ।।
- বসুদেৱ হেন শুনি।
- তবধ ভৈলন্ত গুণি।।
- ৰুক্মিণী মূৰ্ছিতা আতি।
- কান্দন্ত দৈৱকী সতী।।
- শোকে যায় প্ৰাণ ফুটি।
- ভূমিত পাৰন্ত লুটি।।
- পুত্ৰ হৰুৱাওঁ যেনো।
- শ্যামল সুন্দৰ তনু।।
- পীতবস্ত্ৰে শোভে কায়।।
- মেঘত বিজুলী প্ৰায়।
- মুখ চন্দ্ৰো নুহি সৰি।।
- কমললোচন হৰি।
- কৰ্ণত কুণ্ডল দোলে।।
- বনমালা শোভে-গলে।
- ভ্ৰমৰে নছাড়ে লোভে।।
- শিৰত কিৰীটি শোভে।
- কণ্ঠত কৌস্তুভ-মণি।।
- প্ৰভাতৰ সূৰ্য্য যেনি।
- একো অঙ্গে নুহি ৰুজ।।
- আজানু-লম্বিত ভুজ।
- কেয়ূৰ কঙ্কণে ৰঞ্জে।।
- পাদ পঙ্কজক গঞ্জৈ।
- ৰত্নৰ নূপুৰ বাজে।।
- মেখলা কটিৰ মাজে।
- কোটি কন্দৰ্পক জিনি।।
- প্ৰকাশন্ত যদুমণি।
- হেন কৃষ্ণ মোৰ বাপ।।
- এৰাওঁ কৈত তান তাপ।
- যতেক বান্ধৱ জ্ঞাতি।।
- কৰন্ত বিলাপ আতি।
- সমস্ত নগৰী-লোকে।।
- কৰন্ত বিলাপ শোকে।
- সত্ৰাজিত ধূমকেতু।।
- তইসে নাশৰ হেতু।
- নাৰীগণে পাৰে গালি।।
- সত্ৰাজিত পুত্ৰ খালি।
- কৃষ্ণক কলঙ্ক দিয়া।।
- এভু পাপী আছে জীয়া।
- দ্বাৰকা-পুৰক ছানি।।
- কৰৈ হাহাকাৰ ধ্বনি।
- কৃষ্ণৰ কিঙ্কৰে ভণে।।
- শুনিয়োক সৰ্ব্বজনে।
- কৃষ্ণৰ কীৰ্ত্তন কৰি।।
- ডাকি বোলা হৰি হৰি।
- ঘোষা।।
- ও হৰি দীন দয়াল।
- গোপাল পালিয়া নিয়া।।
- তোহ্মাৰ নাম মুখে ফুৰোঁ লৈয়া।
- তোহ্মাৰ চৰণ চিন্তোক হিয়া।।
- ও হৰি দীন দয়াল।
- পদ।।
- পাছে যদু-বংশ যতেক আছে।
- কৃষ্ণ আসন্তোক মনত বাঞ্চে।।
- যাৰ যেন শক্য পাৰিলা মানে।
- পূজিলা দুৰ্গাক বলি-বিধানে।।
- মায়াক আৰাধি সাধন্ত বৰ।
- সত্বৰে আসন্তোক দামোদৰ।।
- পঢ়ি স্তুতি-স্তোত্ৰ কৰে মঙ্গল।
- সিটো আশীৰ্ব্বাদ ভৈল সাম্ফল।।
- ভাৰ্য্যায়ে সহিতে আসিলা হৰি।
- গ্ৰীৱাত স্যমন্ত-মণিক ধৰি।।
- দেখন্ত সৱে আইলা যদুৰায়।
- মৰি উপজিলা যেন দুনাই।।
- লগতে কন্যাক আসিল লই।
- সমস্ত সুহৃদে বেঢ়িলা গই।।
- পৰম ৰঙ্গে কৰে শুভ শুভ।
- শিৰত সিঞ্চিলা অক্ষত-দূৰ্ব।।
- পাছে দিব্য সভা যাদৱে পাতি।
- আনিলন্ত সত্ৰাজিতক মাতি।।
- যিমতে মণিক পাইলন্ত তথা।
- ৰাজ-সমাজত কহিলা কথা।।
- সাক্ষী কৰি হৰি সৱে সভাতে।
- দিলা মণি সত্ৰাজিতৰ হাতে।।
- হাতত মণি লৈয়া সত্ৰাজিত।
- ভৈলন্ত লাজ আতি বিপৰীত।।
- কৰে অনুতাপ মনে আসুখে।
- গৃহক চলি গৈল আধোমুখে।।
- আপুনি কৃষ্ণক বিৰোধ কৰি।
- ৰাতি-দিনে চিন্তে নিদ্ৰাক এৰি।।
- মঞি মহা মূঢ় পাপী নিঃশঙ্ক।
- মিছাতে কৃষ্ণক দিলো কলঙ্ক।।
- কিমতে এড়াইবো লোকৰ শাপ।।
- কেনে তুষ্ট হোন্ত জগত-বাপ।
- কিমতে কৃষ্ণৰ ৰঞ্জিবো চিত্ত।।
- গুণন্ত এহি বুলি সত্ৰাজিত।
- কৃষ্ণৰ কিঙ্কৰে কহে শঙ্কৰে।।
- হৰি হৰি বোলা সমস্ত নৰে।
- ঘোষা।।
- হৰি ৰাম ৰাম ৰাম ৰাম ৰাম হৰি।
- ডাকিয়া ঘোষিয়ো শীঘ্ৰ কৰি।।
- পদ।।
- দেওঁ কন্যা বিৱাহ কৃষ্ণক।
- দিবো মণি স্যমন্ত যৌতুক।।
- তেৱেসে সন্তুষ্ট হোন্ত হৰি।
- নেদেখো উপায় আত কৰি।।
- হেনমতে নিয়ম কৰিয়া।
- মণি সমে কন্যা দিলা নিয়া।।
- পায়া সত্যভামাক অচ্যুতে।
- কৰিলা বিৱাহ বিধিমতে।।
- ৰূপে-গুণে জগততে ধন্যা।
- খুজিল অনেকে সিটো কন্যা।।
- কাহাকো নিদিল সত্ৰাজিত।
- কৃষ্ণে পাই ভৈলা কৃতকৃত্য।।
- শশুৰক বুলিলা বচন।
- নাহিকে মণিত প্ৰয়োজন।।
- তোমাত থাকোক স্যমন্তক।
- তুমি সত্ৰাজিত অপুত্ৰক।।
- তোমাৰ সৰ্ব্বস্ব সৱে মোৰ।
- নিয়া মণি এড়া চিন্তা ঘোৰ।।
- শুনি সত্ৰাজিত ৰঙ্গ ভৈল।
- স্যমন্তক লৈয়া গৃহে গৈল।।
- অনন্তৰে জগতৰে নাহ।
- কৰি সত্যভামাক বিৱাহ।।
- ক্রীড়িলা আনন্দে নাৰায়ণ।
- যিটো শুনে স্যমন্ত হৰণ।।
- ক্ৰীড়ালা আনন্দে নাৰায়ণ।
- যিটো শুনে স্যমন্ত-হৰণ।।
- এৰায়া কলঙ্ক মহা-পাপ।
- দূৰ যায় সংসাৰৰ তাপ।।
- হোৱৈ সিদ্ধি মনৰ বাঞ্ছিত।
- জানি শুনা কৃষ্ণৰ চৰিত।।
- কহে কৃষ্ণ কিঙ্কৰে শঙ্কৰে।
- কীৰ্ত্তন নেৰিবা একো নৰে।।
- আতপৰে নাহিকে উপায়।
- বেদৰো এহিসে অভিপ্ৰায়।।
- মায়াময় পুত্ৰ দাৰা গেহ।
- কেতিক্ষণে পৰৈ ইটো দেহ।।
- আক নেদেখয় কিনো অন্ধ।
- বিষয়ত তথাপি প্ৰবন্ধ।।
- আন চিন্তা সৱে পৰিহৰা।
- মিছা মোৰ মোৰ বুলি মৰা।।
- অন্তকে কেশত আছে ধৰি।
- জানি ডাকি বোলা হৰি হৰি।।
- ।।স্যমন্তক হৰণ সমাপ্ত।।