জুইৰে আঁকিলি তৰা আকাশত
জুইৰে আঁকিলি তৰা আকাশত
জুইৰে আঁকিলি তৰা
কোন কাহানিৰে পৰা ?
কোন কাহানিৰে পৰা
আকাশত আঁকিলি তৰা--- আন্ধাৰ পোহৰ কৰা?
পৃথিৱী আঁকিলি
ইমান ফুলৰে
শেৱালি নেৱালি পলাশেৰে
চম্পা কেতেকী পদুমৰে
ৰূপৰে
ৰসৰে
বৰণেৰে
গন্ধ গানৰে ভৰা
কোন কাহানিৰে পৰা?
অনাদিকালৰ প্ৰথম শিল্পী তই
অশেষ সপোন
আঁকিছ বিশেষকৈ
এক নিমিষৰ মানৱ শিল্পী হৈ
আহিলোঁ পৃথিৱীলৈ
তয়ে অঁকা ছবি
সজাই পৰাই
শুৱনি কৰিবলৈ৷৷