তাৰ পাছত কৃষ্ণই অৰ্জ্জুনক আৰু কৈছে—
“যদক্ষৰং বেদবিদো বদন্তি
বিশন্তি যদ্ যতয়ো বীতৰাগাঃ।
যদিচ্ছন্তো ব্ৰহ্মচৰ্য্যং চৰন্তি
তৎ তে পদং সংগ্ৰহেণ প্ৰবক্ষ্যে।” ৮৷১১
‘বেদৱিদসকলে যাক অক্ষৰ বোলে, যতিসকলে যাত প্ৰবেশ কৰে, যাক পাবলৈ ব্ৰহ্মচৰ্য্য পালন কৰা হয়, সেই (ব্ৰহ্ম) পদ তোমাক চমুকৈ ক’ম।’
“ওমিত্যেকাক্ষৰং ব্ৰহ্ম ব্যাহৰন্ মামনুস্মৰণ।
যঃ প্ৰয়াতি ত্যজন্ দেহং স যাতি পৰমাং গতিম্।” ৮৷১৩
“ওঁ বোলা একাক্ষৰী ব্ৰহ্ম (শব্দ) উচ্চাৰণ কৰি যি মোক স্মৰি দেহ ত্যাগ কৰে তেওঁ পৰম গতি ( মুক্তি ) পায়।”
“অব্যক্তোহক্ষৰ ইত্যুক্তস্তমাহুঃ পৰমাং গতিম্।
যং প্ৰাপ্য ন নিবৰ্তন্তে তদ্ধাম পৰমং মম।” ৮৷২১
‘যাক অব্যক্ত অক্ষৰ বুলি কয় তেওঁকেই পৰম গতি বোলে। যাক পালে (কোনো ) ঘুৰি নাহে, সেয়ে মোৰ পৰম ধাম।’
“তদ্বিষ্ণোঃ পৰমং পদম ইতি শ্ৰুতিঃ। পদ্যতে গম্যতে ইতি পদম্।” পদ মানে প্ৰাপ্য বস্তু; বিষ্ণুৰ পদ মানে প্ৰাপ্য বস্তু বিষ্ণু স্বয়ং।
