এই পৃষ্ঠাটোৰ বৈধকৰণ হৈছে
কীৰ্ত্তন ৪
৪৯৫
শ্ৰীকৃষ্ণৰ বৈকুণ্ঠ প্ৰয়াণ
চতুৰ্থ কীৰ্ত্তন
ঘোষা॥ নৰহৰি কি এ ৰাম নিস্তাৰিয়া নিয়ো নাৰায়ণ
মাথাত ধৰিবো তুলি তোমাৰ চৰণ।৷ ৪
পদ॥ উদ্ধৱক সম্বুধি মাতন্ত কৃষ্ণ পাছে।
কৰ্ম্ম-বন্ধ এড়াইবে প্ৰবন্ধ যাৰ আছে।৷
বৈষ্ণৱৰ সঙ্গ সিটো লৈবে প্ৰথমত।
মোহোৰ চৰিত্ৰ শুনিবেক ভকতত॥ ৩৫
মোৰ নাম-কীৰ্ত্তন কৰিবে সৰ্ব্বক্ষণে।
হৃদয়ত মোৰ ৰূপ চিন্তিবে যতনে।
মোৰ যশ গায়া যিটো কৰে গীত নৃত্য৷
নাহি তাৰ চিন্তা সিটো ভৈল কৃতকৃত্য।৷ ৩৬
শুনিয়ো উদ্ধৱ আৱে ৰহস্য ভকতি।
কৰিবা অভ্যাস তুমি থিৰ কৰি মতি।৷
সমন্তে ভূততে ব্যাপি আছে মঞি হৰি।
সৱাকো মানিবা তুমি বিষ্ণু-বুদ্ধি কৰি॥ ৩৭
ব্ৰাহ্মণৰ চাণ্ডালৰ নিবিচাৰি কুল।
দাতাত চোৰত যেন দৃষ্টি এক তুল॥
নীচত সাধুত যাৰ লৈ এক-জ্ঞান।
তাহাকেসে পণ্ডিত বুলিয় সৰ্ব্বজান।৷ ৩৮
