এই পৃষ্ঠাটোৰ বৈধকৰণ হৈছে
২৪
স্ত্ৰী পৰ্ব্ব।
গান্ধাৰী প্ৰভৃতি স্ত্ৰী সকলৰ শোক
আৰু ধৃতৰাষ্ট্ৰ আদি সকলোৰে
কুৰুক্ষেত্ৰলৈ গমন।
পদ।
অনন্তৰে জন্মিজয় সাদৰে পুচন্ত।
কোৱা পাছ কথা মুনি শুনো আদি অন্ত॥
অন্ধক নৃপতি কিবা কৰিলে তথাত।
গান্ধাৰী প্ৰভৃতি আনো নাৰী অসংখ্যাত॥
যাহাৰ তনয় শত ৰণত মৰিল।
হেন পুত্ৰ-শোক ৰাণী কিমতে সহিল॥
মৰিল ৰণত আসি যত ৰাজাগণ।
কোৱা কোনে কৰিলেক তাৰ পিণ্ডদান।
বৈশম্পায়ণ বদতি শুনিয়ো নৃপবৰ।
ব্যাসৰ বচনে স্তম্ভি ৰৈলা কুৰুবৰ॥
এতহন্তে সঞ্জয়ে বুলিলা কৰযোৰ।
এক বোলে বোলো শুনিয়োক নৃপবৰ॥
বহু দেশ হন্তে আইল অনেক নৃপতি।
নিমন্ত্ৰিয়া আনিলেক তোমাৰ সন্ততি॥
সবান্ধৱে কুৰুক্ষেত্ৰে ৰণে ভৈলা ক্ষয়।
তাৰ প্ৰেত কৰ্ম্ম কৰিবাক যোগ্য হয়॥
