এই পৃষ্ঠাটোৰ বৈধকৰণ হৈছে
৯২
স্ত্ৰী পৰ্ব্ব।
হা দুৰ্য্যোধন ভাই কি কাৰ্য্য সাধিলা৷
মিছা কাৰ্য্যে বিস্তৰ প্ৰাণীক বিনাশিলা॥
ধৰ্ম্ম পথ এড়ি পাপ কৰিলা সকল।
নিমিষতে পাইলা সেই অধৰ্ম্মৰ ফল॥
হেন মতে যুধিষ্ঠিৰ কান্দয় অশেষ।
প্ৰবোধ কৰয় দেখি পাছে হৃষিকেশ॥
বিস্তৰ ক্ৰন্দনে মৃতকৰ নোহে হিত।
হেন জানি সন্তাপক এড়িতে উচিত॥
হৰিৰ মহিমা কোনে বুজিবে শকত।
তান ইচ্ছা যে হেন আচৰে ক্ষণেকত॥
অনন্তৰে যুধিষ্ঠিৰ আদি যতজন।
গঙ্গাৰ তীৰক সবে কৰিলা গমন॥
সৰ্ব্বজন পাইলা যাই জহ্ণবীৰ তীৰ।
বিধিয়তে প্ৰেত কৰ্ম্ম কৰে যুধিষ্ঠিৰ॥
নাৰী সকলেয়ো কৰে গঙ্গা জলে স্নান।
মৃতকৰ হিতে তৈতে কৰে নানা দান॥
নিজ গুৰু ব্ৰাহ্মণে বোলান্ত বেদ বাণী।
আচৰিলা যুধিষ্ঠিৰ মনে দুঃখ মানি॥
শত ভাই কৌৰৱৰ কৰিলা তৰ্পণ।
ৰণে মৰিলেক আৰু যত ৰাজাগণ॥
বিধিয়তে বেদ ক্ৰীয়া প্ৰত্যেকে কৰিলা।
হেনকালে কুন্তী দেবী বচন বুলিলা॥
