এই পৃষ্ঠাটোৰ বৈধকৰণ হৈছে
সপ্তম পটল
শিৱ নিগদতি মুনি শুনা সাৱধানে।
নামৰ মহিমা মই কহোঁ বিদ্যমানে॥ ২৩৩॥
কৃষ্ণ পাদ পঙ্কজত কৰিয়া আশ্ৰয়।
যিটো নিতে সহস্ৰেক নামক শুনয়॥
মহ৷ শ্ৰদ্ধাভাৱে যিবা কীৰ্ত্তন কৰয়।
পৰম আদৰে যিটো তাহাক স্মৰয়॥ ২৩৪॥
যদিবা শতেক গাৱে নুহিৱা বিংশতি।
দশ বা পঞ্চ বা এক যিমান শকতি॥
নিষ্কাম ভকতি ভাৱে যি কৰে কীৰ্ত্তন।
তাহাৰ ফলৰ অন্ত নেদেখোঁ শোভন॥ ২৩৫॥
যাতো সেহিজনে বশ্য কৰিলে হৰিক।
হৰিয়ো তাহান্ত বিনে নেদেখে অধিক॥
যিহেতু নামেসে তীৰ্থক্ষেত্ৰ পুণ্যতপ।
নামেসে পৰম দেৱ নামে মূল জপ॥ ২৩৬॥
নামেসে পৰম ক্ৰিয়া নামে মুখ্য দান।
নামেসে পৰম ধৰ্ম্ম নামে মুখ্য কাম॥
ভকতৰ মুখ্য চাৰি পুৰুষাৰ্থ নাম।
সকামীৰ কাম সাধে ইসে অনুপাম॥ ২৩৭॥
নামেসে পৰম ভক্তি নামে মুখ্যগতি।
নামেসে পৰম প্ৰাপ্য মঙ্গল সম্প্ৰতি॥
