এই পৃষ্ঠাটোৰ বৈধকৰণ হৈছে
ষষ্ঠ পটল
নাৰদ বদতি দেৱ-দেৱ মহেশ্বৰ।
কৃষ্ণ কথা তযু মুখে শুনিলোঁ সুন্দৰ॥ ২০৮॥
হৰি নাম কীৰ্ত্তনে সমস্তে পাপ হৰে।
মহাসুখ ভকতিক সাধে সমস্তৰে॥
কৰিলা আদেশ মোক কৰিতে কীৰ্ত্তন।
যিবা যিবা নাম সব গাইৱোঁ অনুক্ষণ॥ ২০৯॥
যি সব সকলে নাম জানিবাক চাওঁ।
কহিয়োক প্ৰভু মহা কৌতুকক পাওঁ॥
শিৱ নিগদতি মুনি শুনিয়ো সাক্ষাত।
সকল নামক কোনে কহিতে শকত॥ ২১০॥
ভূমি জল তেজ পৰমানু আছে যত।
অনেক জনমে যিবা গণিতে শকত॥
হৰিৰ নামক তভু নপাৰে গণিত।
তথাপিতো মুখ্য কিছু কহিবোঁ তোমাত॥ ২১১॥
বিষ্ণুৰ সহস্ৰ নাম আতি বিপৰীত।
তাক পূৰ্ব্বে মই কহি আছো পাৰ্ব্বতীত॥
হুয়া সমাধিত স্থিত আছোঁ যি কালত।
পুছিলা পাৰ্ব্বতী মোত হুয়া অৱনত॥ ২১২॥
কাহাক চিন্তাহা নাথ কাৰ লৱা নাম।
তুমি বিনে কোন দেৱ আছে অনুপাম॥
