এই পৃষ্ঠাটোৰ বৈধকৰণ হৈছে
তৃতীয় পটল
নাৰদ বদতি প্ৰভু কহিলা সাক্ষাত।
পূৰ্ণকলা অংশভেদ বুজিতে ইহাত॥ ৮৮॥
নিৰ্ব্বিকল্প কৃষ্ণ ব্ৰহ্ম পৰমাত্মা এক।
কেনে অংশ কলাভেদ কহিয়ো প্ৰত্যেক॥
শঙ্কৰ বদতি সাধু পুছিলা নাৰদ।
কৃষ্ণৰ যে অৱতাৰ অংশকলাভেদ॥ ৮৯॥
হৰিপৰ জ্ঞানীসবে ভেদ নেদেখস্ত।
বোলে নিৰ্ব্বিকল্প ব্ৰহ্ম নিৰ্ভেদ অনস্ত॥
কিন্তু সাধুসবে জ্ঞান প্ৰভাৱ আদিৰ।
পূৰ্ণ অংশ দেখি মানে ঈশ্বৰ মূৰ্ত্তিৰ॥ ৯০॥
সকলতে সবে যদি মহিমা আছয়।
তথাপি কাৰ্য্যত অল্প বিস্তৰ দেখয়॥
এতেকেসে পূৰ্ণ অংশ কৰিয়া কহয়।
শুনিয়ো নাৰদ আবে ইহাৰ নিৰ্ণয়॥ ৯১॥
ধৰ্ম্ম জ্ঞান ঐশ্বৰ্য্য বৈৰাগ্য শ্ৰী যশ।
সবে জাত দেখি পূৰ্ণ জানিবা অৱশ্য॥
চতুৰ্থ ভাগকে আবে অংশ বুলি কয়।
ষোড়শ ভাগক কলা জানিবা নিশ্চয়॥ ৯২॥
শতেক ভাগকে জানা বিভূতি বোলয়।
আবে ধৰ্ম্মজ্ঞানাদিৰ শুনিয়ো নিৰ্ণয়॥
