এই পৃষ্ঠাটোৰ মুদ্ৰণ সংশোধন কৰা হৈছে
৷৹
নাতিনী খানিক ৰতিকান্তদেৱে
তুলিলন্ত স্নেহ কৰি।
শুকাইৰ পুত্ৰক যদুক আনিয়া
বিহাইলা যত্ন কৰি॥
তানে গৰ্ব্ভে জাত তিনি পুত্ৰ খ্যাত
বিষ্ণুৰ সেৱক ভৈলা।
চিদানন্দ নিত্যা নন্দ কনিষ্ঠৰ
হৃদয়ানন্দ নাম থৈলা॥
❃ ❃ ❃ ❃
হৃদয়ানন্দক অনন্ত বোলয়
সৰ্ব্বগুণে অনুপাম।
বাৰাদিৰ হন্তে উজানে আসিয়া
কৈলা আৰু নানা কাম॥
তেহো যে আসিয়া মায়ংৰাজ্যত
কালশিলা গ্ৰামে ৰৈলা॥
অতি ভয়ানক বিলখন তাত
সেহি নামে গ্ৰাম ভৈলা॥
❃ ❃ ❃ ❃
প্ৰেমলতা আৰু ৰাম যে কীৰ্ত্তন
দুই শাস্ত্ৰ কৰিলন্ত।
সেহি কাৰণত কালশিলা সত্ৰে
অদ্যাপি কীৰ্ত্তি ৰৈলন্ত॥
