এই পৃষ্ঠাটোৰ বৈধকৰণ হৈছে
পঞ্চম অধ্যায়
কৰ্ম-সন্ন্যাস যোগ
দুলড়ী
অৰ্জ্জুন বদতি বোলা যদুপতি
জ্ঞানত সমস্ত হয়।
তাত আৰো কৰ্ম্ম শ্ৰেষ্ঠ কৰি কহা
ইহাত বৰ সংশয়॥
কৃষ্ণে বোলে জ্ঞান কৰ্ম্মক কৰিলো
ফলতো দুয়ো সমান।
নকৰিলে কৰ্ম্ম সন্ন্যাস নিসিজে
এতেকে কৰ্ম্ম প্ৰধান॥৩৩৩
ঈশ্বৰৰ অৰ্থে ৰাগ দ্বেষ এৰি
গৃহে থাকি কৰ্ম্ম কৰে।
জানিবা সন্ন্যাস সিজিল তাহাৰ
অনায়াসে সিটো তৰে॥
সাংখ্যজ্ঞান-কৰ্ম্ম দুইৰো একে ধৰ্ম্ম
আৰ দুইৰো একে গতি।
তাক ভিন্ন কৰি যিজনে দেখয়
সিটো মুৰ্খ মন্দমতি॥৩৩৪
