এই পৃষ্ঠাটোৰ বৈধকৰণ হৈছে
৬
শিশু লীলা।
এহি মতে ব্ৰজে আনন্দে হৰি।
কৰন্ত ক্ৰীড়া শিশু ৰূপ ধৰি॥
যত গোপ শিশু বলাই আদি।
সবে ভৈল গৈয়া কৃষ্ণৰ বাদী॥
যশোদাৰ আগে দিলেক খল।
খাইলেক কৃষ্ণে মাটি এক দল॥
শুনিয়া যশোদা সুন্দৰী হাসি।
পুত্ৰৰ হাতত ধৰিল আসি॥
কেনে মাটি খাইলি অৰে গোপল।
কোবাই আজি তোৰ ফাড়িবো ছাল
শুনিয়া কৃষ্ণৰ হৰিল মাত।
চক্ষু টেৰ কৰি মাৱক চান্ত॥
ভয়তে যেন কাম্পে হাত ভৰি।
যশোদা দেখে পুত্ৰ গৈল ডৰি॥
মুখক চাহন্তে লাগয় বেথা।
কিয় মাটি খাইলি শোধন্ত কথা॥
লগৰ শিশু বোলে সমুদায়।
বলায়ো বোলে তোৰ শ্ৰেষ্ঠ ভাই॥
মাতন্ত কৃষ্ণে যশোদাক চাই।
মিছা মাতে সবে শুনিয়ো আই॥
