এই পৃষ্ঠাটোৰ বৈধকৰণ হৈছে
৩০
শিশু লীলা।
কি ভৈল পুত্ৰ বুলি উকি দিয়া।
দুহাতে জৱাঁলে ধাকুৰে হিয়া॥
কৃষ্ণৰ সুন্দৰ বদন চাই।
যশোদা কান্দন্ত গুণ বৰ্ণায়॥
গোধূলি কোনে যাইবে বংশী বাই।
কোনে মোক গৈয়া বুলিবে আই॥
ধূলা জাৰি কাক কৰাইবে স্নান।
কোনে কৰিবেক গোৰস পান॥
কাক বিছাই দিবো শীতল তুলী।
ডাকিবো কাক জাগ কৃষ্ণ বুলি॥
সুন্দৰ বদনে বজায়া বেণু।
প্ৰভাতে কোনে চৰাইবেক ধেনু॥
কি ভৈল আজি কৃষ্ণ মোৰ বাপ।
মৰিয়ো নেড়াইবো তোৰ সন্তাপ॥
এহি বুলি কান্দে কৃষ্ণক চাই।
যশোদা নন্দে জাম্প দিবে যায়॥
দেখি বলভদ্ৰে বাধিল হাসি।
এখনে আসিব কালীক নাশি॥
কৃষ্ণক লাগিয়া এড়া ক্ৰন্দন।
হেন শুনি সবে যুড়াইল মন॥
