এই পৃষ্ঠাটোৰ বৈধকৰণ হৈছে
(৬)
হেনশুনি সন্যাসীৰ ক্ৰোধ উপজিলা।
কান্ধ হন্তে ঝুলীখনি মাটিত ৰাখিলা॥
চেলাক বোলয় জল আনিও সত্বৰ।
মোহোৰ শকতি দেখাও চাওক নিৰন্তৰ॥ ২৭
হেন শুনি চেলা গোটে জল আনি দিলা৷
জল লৈয়া সন্ন্যাসীয়ে মন্ত্ৰক জপিলা॥
মন্ত্ৰ পঢ়ি জলাঞ্জলী চিতা মাৰিলন্ত।
বনে পৰি অগ্নি হৈয়া পুৰিয়া গৈলন্ত॥২৮
দেখি সামৰাজে পাছে বিষ্ময় ভৈলন্ত।
ভূঞাঁ বোলে ইটো একো নহয় অদভুত॥
ইটো সন্যাসীৰ মই পাইলোহো আসয়।
জলক অগনি কৰা আচৰিত নয়॥২৯
এহি বুলি জল খুজি লৈলেক হাতত।
মন্ত্ৰ পঢ়ি মাৰি দিলা হৰিৰ গৃহত॥
দপ দপ্ কৰি অগ্নি উঠিল জলিয়া।
দেখে পুৰি যাই গৃহ ভষ্মকৃত হৈয়া॥ ৩০
আৰু একাঞ্জলী জল আনি তাত পাছে।
কিনো কৰে বুলি সামৰাজে চাই আছে॥
মন্ত্ৰ পঢ়ি চিতা মাৰি জলক দিলেক।
সেহি জলে সিটো জুই নুমাই দিলেক॥৩১
দেখিয়া বিষ্ময় ভৈলা প্ৰজা সমুহৰ।
সেই ধৰি পোৰা নাম ভৈলেক সত্ৰৰ॥
