এই পৃষ্ঠাটোৰ বৈধকৰণ হৈছে
৪
লীলামালা।
পাছে উপজিলা নিজৰূপে দামোদৰ।
দেখি পিতৃ মাতৃ স্তুতি কৰিলা বিস্তৰ॥
উপৰি জন্মৰ কথা নাৰায়ণে কৈলা।
কংসভয়ে বসুদেৱে গোকুলত থৈলা॥ ৩॥
দেখি পুত্ৰ মুখ নন্দ আনন্দে বিহ্বল।
তনয়ৰ জাতকৰ্ম্ম কৰাইলা সকল॥
দৈত্যক বধিবে আৰম্ভিলা গোকুলত।
পুতনাৰ চেতনা শুষিলা প্ৰথমত॥ ৪ ॥
শকটৰ তলে থৈলা যশোদা শুৱাই।
পেলাইলাহা পাৱে শকটক উভটাই ॥
তুলিলাহা হামি যশোদাৰ পিয়া স্তন।
গৰ্ব্ভতে দেখিলা দেবী চৈধ্যয় ভুবন॥ ৫ ॥
বিস্ময় দেখিয়া আঁখি মুদিলা সুন্দৰী।
তাত পাছে চক্ৰবাতে নিলা চুৰি কৰি॥
গলত চেপিয়া ধৰি পেলাইল শিলাত।
মৰি গৈল দুষ্ট দৈত্য তোমাৰ লীলাত ॥ ৬ ॥
জাতকৰ্ম্ম কৰি গৰ্গঋষি থৈলা নাম।
গোকুলত ক্ৰীড়ন্তে ফুৰন্তে কৃষ্ণৰাম॥
নাচাবুলি পাঞ্চৈ গোপী বজায়া চাপৰি।
কৰিলন্ত নৃত্য ভঙ্গী ভাৱে দেৱ হৰি॥ ৭ ॥
যশোদা সুধিলা ধৰি কিয় মাটী খাইলি।
নখাইলোঁ বুলিয়া বেন্ত বাইলা বনমালী॥
