এই পৃষ্ঠাটোৰ বৈধকৰণ হৈছে
চতুৰ্থ সৰ্গ।
স্পন্দন বিহীন ভুজ,— ৰক্ত নিৰ্ব্বাপিত
পাঠান সেনাৰ,—হ’ল অবাক যৱন
বীৰ ৰমণীক দেখি,—পৰিল মাটিত
পাঠান সেনাৰ অস্ত্ৰ, পাহৰিলে সৱে
বাহ্যজ্ঞান,—তধালাগি একেথিৰে চাই
ৰমণী সবৰে ফালে ভুলিলে খন্তেক
শত্ৰুভাৱ, — যুদ্ধক্ষেত্ৰ,দাৰুণ সমৰ॥
আহিল মুহুৰ্ত্তে তাত অনঙ্গ খন্তেক
অনঙ্গ মোহিনী স’তে,—আহিল বসন্ত
হাঁহি মধুময় হাঁহি,—ক’লে কাণে কাণে,
যৱন সেনাৰ কিবা,—দেখিলে যৱনে,—
উদিল অতৃপ্ত তৃষ্ণা, লালসা, প্ৰাণত
যৱনৰ, — এখন্তেক গলিল অন্তৰ
তুষাৰ যিৰূপে গলে সূৰ্য্য-কিৰণত
কিম্বা ঘৃত গলে যেনে কাষত অগ্নিৰ॥
নিৰ্ব্বাক যৱন-সেনা,—নিৰ্ব্বাক তুৰ্ব্বক
( পাঠানৰ সেনাপতি ) দানৱ যুদ্ধত
দেখি বিশ্ববিমোহিনী দেবী ভগৱতী
৬৪(ক)
