এই পৃষ্ঠাটোৰ বৈধকৰণ হৈছে
(ক)
কোনে আজি গোৱা গান উদ্যান-মাজত
অমিয় সুৰেৰে মোহি কবিৰ হৃদয়?
কিনো মাত, কিনো গীত! কি নাম তোমাৰ?
যি গান গাহিছা তুমি অতি মধুময়॥
ভয়-ভয়-ভয় মনে, মধুৰ ললীত
গাই গান, পুনু কিয় তধা লাগি ৰোৱাঁ?
বলিছে মলয়া বায়ু মৃদুল মধুৰ,
কি ভয় তোমাৰ? তুমি কিনো ভয় পোৱা?
চিনিছো এতিয়া, পখি। প্ৰকৃতিৰ শোভা,
বসন্তৰ সঙ্গী তুমি গীত–প্ৰিয় কুলি,
গাইছা স্বভাব গীত সুমধুৰ তানে
গছৰ ডালত বহি পঞ্চমত তুলি॥
মধুৰ তোমাৰ গান (কুউ কুউ মাত)
গোৱাঁ, পখি! দগ্ধ প্ৰাণ হ’ক মোৰ শাঁত॥
