এই পৃষ্ঠাটোৰ বৈধকৰণ হৈছে
(খ)
নাঢাকিবা নাঢাকিবা মুখ ৰমণীৰ
মিনতি কৰিছোঁ মই তোমাক,—ওৰণি।
সংসাৰ-ফুলনিবন,—ধৰিছে শুৱাই
সুন্দৰ গোলাপ পাহি জগত শুৱনী॥
সংসাৰ বিষাদে-ভৰা, তাপিত নৰৰ
জুড়াব’ তাপিত প্ৰাণ বিধি দয়া কৰি
শান্তিৰ নিজৰা ৰূপে কৰিলে সৃজন
ৰমণীৰ মুখখনি, নধৰাঁ আবৰি॥
যি মুখ খন্তেক মাথোঁ দেখাৰ আশাত
প্ৰেমিক আকুল হয়, পাহৰে সংসাৰ,
সেই মুখখনি তুমি নাঢাকা, ওৰণি।
মূৰ্ত্তিমতী শান্তি ৰাজে মুখত প্ৰিয়াৰ॥
কেতু তুমি? কিয়, হায়! ঢাকিছা জোনক?
উলিয়াই দিয়াঁ জোন জগতে দেখক॥
