এই পৃষ্ঠাটোৰ বৈধকৰণ হৈছে
দেবতা অমৰ হ'ল কৰি সুধা পান
অশ্বত্থমা অমৰণ পাই দেৱ-বৰ;
কিন্তু কলি যুগ আজি, নেদেখি দেৱতা,
মৰ্ত্ত্যভূমি পাব ক’ত ৰস অমৃতৰ?
আৰাধনা বলে তুষ্ট কৰি দেৱতাক
আনিব নোৱাৰি মাতি আৰু পৃথিবীত ,
অমৃতৰ নাই নই, কৰি যাক পান
অমৰণ হ’ব নৰ মৰত ভূমিত॥
নোহোক অমৃত আৰু নোহোক দেৱতা,
কিন্তু, যশ! তুমি কৃপা কৰা যি নৰক
অমৰত্ব কৰি লাভ তোমাৰ কৃপাত
চিৰজীবী হয় সিটো উপেক্ষি কালক॥
মৃত্যুৰ পাছতো কৰা নৰক, সমৰ,
অমৰণ, যশ! তুমি মৰ জগতৰ॥
