এই পৃষ্ঠাটোৰ বৈধকৰণ হৈছে
২৪০
ভক্তি-ৰত্নাৱলী
দিয়া তাসম্বাক অতি আনন্দ সদায়।
এতেকে তোমাত মিত্ৰৱতি ভঙ্গ নাই॥
প্ৰাকৃত মিত্ৰৰ দেশান্তৰাদি গমনে।
সুহৃদ বিয়োগ মহা দুঃখ মিলে মনে॥১১২৬॥
তুমি সনাতন পুনু জগত ব্যাপক।
কদাচিতো শঙ্কা নাই বিয়োগ দুঃখক॥
এহি হেতু তুমি কৃষ্ণ মিত্ৰ ভৈলা যাৰ।
কোনে কহিবাক পাৰে ভাগ্যক তাহাৰ॥১১২৭॥
এহি মানে থৈলো বাক্য ব্ৰহ্মাৰ সকল।
ঋভষ দেৱৰ বাক্যে দেখাওঁ আৰ ফল॥
ভৰতাদি পুত্ৰত কহন্ত কৃপাময়।
অপৰ্ণা নকৰি কৰ্ম্ম যতেক কৰয়॥১১২৮॥
সেহি কৰ্ম্মে বন্দী হৈয়া ফুৰে সংসাৰত।
অনাদি অবিদ্যা পুৰুষক কৰে হত॥
পূৰ্ব্ব কৰ্ম্ম বাসনায় নেড়য় মনক।
সেহি মনে পুনু পুনু কৰাৱে কৰ্ম্মক॥১১২৯॥
জীৱন্ত মুক্তকো নেড়ে অবিদ্যা তাৱত।
মই বাসুদেৱ প্ৰতি নকৰে যাৱত॥
জ্ঞানে কৰ্ম্মে দেহৰ বন্ধন নুগুচয়।
পুনু পুনু জীৱে সংসাৰত প্ৰবৰ্ত্তয়॥১১৩০॥
পূৰ্ব্ব কৰ্ম্মকৰ্ত্তা মনে কৰয় অনিষ্ট।
পুৰুষক পুনশ্চ কৰাৱে কৰ্ম্ম নিষ্ঠ॥
