এই পৃষ্ঠাটোৰ বৈধকৰণ হৈছে
২৮
বৈষ্ণৱী কীৰ্ত্তন।
ৰাগ ধনশ্ৰী।
নাৰায়ণ কাহে ভকতি কৰো তেৰা।
মেৰি পামৰ মন মাধৱ ঘনে ঘন
ঘাতুক পাপ ন ছোৰা॥
যত জীৱ জঙ্গম কীট পতঙ্গম
অগ নগ জগতেৰি কায়া।
সবকহু মাৰি পূৰত ওহি উদৰ
নাহি কৰত ভূত দায়া॥
ঈশ স্বৰূপে হৰি সবঘটে বৈঠহ
যৈছন গগণ বিয়াপি।
নিন্দা বাদ পিশূন হিংসা হৰি তেৰি
কৰোহোঁ হামু পাপী॥
কাকু শঙ্কৰ কৰ কৰু কৰুণানাথ
যোন ছাৰহু ৰাম বাণী।
সব অপৰাধক বাধক তুৱা নাম
তাহে শৰণ লেহু জানি॥
⸻
ৰাগ গৌৰী।
নাচে ভালি নাচে মদন গোপালা।
বজায়া মোহন বেণু গলে বনমালা॥
অৰুণ চৰণ দুহোঁ থমকে চলাই।
ঈষত ঈষত হাঁসি পঞ্চম গাই॥
শ্যামল সুন্দৰ চান্দ বয়ন বিকাশ।
কহয় মূৰুখমতি মাধৱ দাস॥
⸻
