এই পৃষ্ঠাটোৰ বৈধকৰণ হৈছে
৩৯
বৈদেহী-বিচ্ছেদ।
প্ৰাণনাথ একমাত্ৰ ধৈৰ্য্যৰ সাগৰ;
ধৈৰ্য্য-জলে স্নান মাত্ৰে ধৈৰ্য্য লাভ হয়;
কিন্তু সেই ধৈৰ্য্য-জল নাথৰ লগত।
ক'ত আছে প্ৰাননাথ অভাগীৰ নাথ?
প্ৰভু! দেখুয়াই দিয়াঁ,
মাতিছোঁ চৰণে ধৰি।
বাল্মীকি—তোমাৰ প্ৰাণনাথ সৰ্ব্বত্ৰে বিৰাজিছে।
গহন কাননে,
বিজন বিপিনে,
আকাশে পাতালে,
তযু প্ৰাণনাথ।
আত্মাই আত্মাই,
শিৰাই শিৰাই,
পৰ্ব্বতে গহ্বৰে,
কৰিছে বিৰাজ।
অটল সমুদ্ৰ,
জগত ব্ৰহ্মাণ্ড,
স্বৰগ বৈকুণ্ঠ,
যাৰ অন্তৰত।
চন্দ্ৰ সূৰ্য্য অগ্নি,
তাৰকা মণ্ডলী,
প্ৰকাশে শততে
যাৰ আদেশত।
