এই পৃষ্ঠাটোৰ বৈধকৰণ হৈছে
৬
বৈদেহী-বিচ্ছেদ।
শ্ৰীৰামচন্দ্ৰ আরু বৈদেহীৰ প্ৰবেশ।
ৰাম—(বৈদেহীৰ হাতত ধৰি)
প্ৰিয়ে! মধুৰ হাসিনী!!
শ্ৰীৰামৰ হৃদয় ৰাজ্যৰ, ঘাই পাটেশ্বৰী!!!
আঃ-দেখা দেখা প্ৰিয়ে!
দেৱ ৰাজ্য স্বগত চন্দ্ৰিমাৰ হাঁহি।
মুচুকীয়া হাঁহি মাৰি,
ভনী সৱে বেৰি ধৰি,
থেই থেই নাচি নাচি,
ধেমালি কৰিছে;
কোনোটী ওচৰ চাপি,
স্নেহেৰে সাবতি ধৰি,
বৰ বাই চন্দ্ৰিমাৰ
কোলাতে বহিছে।
ফুলনীতো চোৱাঁ প্ৰিয়ে!
গোলাপ টগৰ যূতি, জাঁই, গুটিমালী,
ফুলিছে সকলো চন্দ্ৰিমাৰ মন বুজি।
জোনাবাইৰ আদৰুৱা, বতাহ কটকী আহি,
বাইটীৰ প্ৰেমবাৰ্ত্তা, ফুলক দিছেহি;
ভনী কুলে বাৰ্ত্তা পাই,
প্ৰেমত পাগলী হৈ,
প্ৰেম, প্ৰেম ৰাও তুলি পৰিছে বাগৰি,
প্ৰেম কি অপূৰ্ব্ব বস্তু, দেখিছানে প্ৰিয়ে!
