এই পৃষ্ঠাটোৰ বৈধকৰণ হৈছে
◇ বিহুগীত ◇ ৮৫ ◇
(২১)
নাচনী চিকুণে এখনি দাপোণে
ককালটি বীণাৰে গোট।
এনে বগীতৰা সোণে গিলিপ মৰা
দাপোণচাই মাৰিলি ফোঁট।
(২২)
ন-পানী বাঢ়িলে ন-জোনটি ওলালে
সলাই বৰেগছে পাত।
আমাৰ নাচনীয়ে বৰণটি সলালে
ললে ৰঙাৰিহা গাত॥
(২৩)
লবৰ মনে গলে ফুলৰে হাঁচতি
হাতৰো নহলো কাজী।
বায়ে নজনাকৈ ব-চুঙা দিছিলো
গগণা নিদিলি সাজি॥
(২৪)
আগলি বাঁহৰে পবালি গগণা
বহি তাঁতপাতত বাঁও।
আহেকি নাহে ঐ আমাৰে নাচনী
চিৰিপাতি মঙলখন চাওঁ॥
(২৫)
বছৰি বছৰি আমে মলিয়ালে
বছৰি বছৰি খাওঁ।
এইবেলি আমেখন কোনে খাইযাব
আমি শদীয়ালৈ যাওঁ॥
(২৬)
একশলৈ নকৰো ভয়ে ঐ নাচনী
দুইশলৈ নকৰো ভয়।
ছকঠীয়া দোণেৰে জুখি থৈ আহিছো
চালিচলৈ নকৰো ভয়॥
(২৭)
আইৰে নিচিনা মেখেলা পিন্ধিলো
বাইৰে নিচিনা খোপা।
একেখন বিহুতে নাচিথৈ আহিছো
তোমাৰে নিচিনা ডেকা॥