এই পৃষ্ঠাটোৰ বৈধকৰণ হৈছে
◇ বিহুগীত ◇ ৭৫ ◇
ডিবুৰু শুৱনী পানী আইটী নইফুল
খোপাত মাৰ গেজেংফুল
হাততে ঐ জেতুকাৰ বোল৷
চেনেহী শুৱনী নই আইটী নইফুল
লহঙী পহঙী নই আইটী নইফুল
মুখৰো নোগুছে হাঁহি আইটী নইফুল
খোপাত মাৰ গেজেংফুল
হাততে ঐ জেতুকাৰ
হাতৰে ঐ জেতুকাৰ বোল॥
(১৭)
চমকত চাবলৈ হায়ৈ ৰাধা হাৰলী
নহওঁ মই বিজুলি হায়ৈ ৰাধা হাৰলী
নহওঁ মই বোঁৱতী নৈয়ে ৰাধা হাৰলী
যমুনালৈ নেযাবি
শ্ৰীকৃষ্ণ গোসায়ে
ঘিলা খেল ঐ খেলিছে
বাটত ধৰি জোকাব
হাতত ধৰি নচাব
গাৰে নো কাপোৰ কানি
জুৰুলি ঐ জুপুৰি।
হায়ৈ ৰাধা হাৰলী তেওঁ তোমাক নেৰিব
মেঘে নো বৰষিব
নাৱে নো চুঙাখোৱা
বঠা নো পোপাখোৱা
সাতো নো সাগৰৰে
ধুমুহা ঐ বলিব
আয়ৈ দেহি ৰাধিকা
ভৰা নোকৈ যমুনা
নাৱে নো হেঙুলীয়া
বঠা নো হেঙুলীয়া
তোমাৰে ঐ আমাৰে
দেহা নো চেঙেলীয়া
চেনাইটি ঐ যমুনা ঐ নকৰে
যমুনা ঐ নকৰে পাৰ॥