এই পৃষ্ঠাটোৰ বৈধকৰণ হৈছে
সুখ-দুখ।
(১)
অনাদি অনন্তৰূপ, বিশ্বনিয়ন্তাৰ,
মহান্ বিধিৰ বিধানত,
চলিছে সৃষ্টিৰ কাৰ্য্য, কেনে সুকৌশলে
পূৰ্ব্বাপৰ একেই ভাবত।
( ২ )
দেখিছোঁ প্ৰকৃতিৰূপ, বিশ্বৰ কোলাত,
কালে কালে নানাৰূপ সাজে,
উৰণ, বুৰণ, আৰু গজন, ভ্ৰমণ,
বন্ধা সদা নিৰূপিত কাজে৷
(৩)
উঠিছে ৰাঙলী বেলি, পূবৰ দিশত,
নিশাৰ আন্ধাৰ আঁতৰাই,
দিনচৰ জগজীৱ', দেখি ই জেউতি,
কৰ্ত্তব্যত দিহাদিহি যায়।
(8)
ফুলনিত ফুল-কলি, প্ৰফুল্লিত হৈ
ভ্ৰমৰা বন্ধুক আনি মাতি,
পীৱাৱে যতেক মধু, সম্ভাষণ কৰি,
নানাভাৱে প্ৰেমালাপ পাতি।
