ষষ্ঠঃ পৰিচ্ছেদঃ।
কোটব্যবস্থা।
অথ কোটনিৰ্মাণম্,-
যাত্বা বৈ ৰিপুৰাভ্যাসং ভূভাগে সাধুসম্মতে।
স্কন্ধাবাৰনিবেশজ্ঞঃ স্কন্ধাবাৰং নিবেশয়েৎ॥
চতুৰস্ৰং চতুদ্বাৰং নাতিবিস্তাৰসঙ্কটম্।
সাটুপ্ৰতোলীপ্ৰাকৰং মহাখাতসমাবৃতং॥
শৃঙ্গাটকাৰ্দ্ধচন্দ্ৰং বা মণ্ডলং দীৰ্ঘমেব বা।
ভূমি প্ৰদেশসামৰ্থ্য়াদাগাৰমুপকল্পয়েৎ॥
বিভক্তৈশ্চ বিবিক্তৈশ্চ পাৰ্শ্বৈৰম্বিতমায়তৈঃ।
গুপ্তং কক্ষপুটাকাৰং মহামাৰ্গসমাবৃতং॥
তস্য মধ্যে মনোহ্লাদি মহন্মৌলবলবৃতম্।
অন্তঃকোশগৃহোপেতং কাৰয়েদ্ৰাজমন্দিৰম্॥
মৌলং ভৃতং সুহৃৎ শ্ৰেণীদ্বিষদাটবিকং বলম্।
ৰাজহৰ্ম্মং সমাবৃত্য ক্ৰমেণ বিনিবেশয়েৎ॥
অন্তঃ স্ববৰ্গিণঃ ক্ৰূৰানলুব্ধান্ দৃষ্টকৰ্মণঃ।
পৰ্যাপ্তবেতনানাপ্তান্ মণ্ডলেন নিবেশয়েৎ॥
হস্তিনো লব্ধনামানস্তুৰঙ্গাশ্চ মনোজবাঃ।
গৃহোপকণ্ঠে নৃপতেৰ্বসেয়ুঃ স্বাপ্তৰক্ষিতাঃ॥
যামবৃত্ত্যা সুসন্নদ্ধং ৰাত্ৰিবিমুদায়ুধম্।
অন্তৰ্বংশিকসৈন্যঞ্চ তিষ্ঠেদ্ ৰাজাভিগুপ্তয়ে॥
যুদ্ধযোগ্যো মহাদন্তী সন্নদ্ধঃ সাধ্বধিষ্ঠিতঃ।
তিষ্ঠেন্নৰপতিদ্বাৰে বেগবাংশ্চ তুৰঙ্গমঃ॥
