এই পৃষ্ঠাটোৰ বৈধকৰণ হৈছে
৫৬
শঙ্কৰ মহাভাগৱত
পুষ্পৰ সুৰভি গন্ধে আমোদিত
মদনে কৰে উন্মাদ॥
অপেস্বৰী সবে কটাক্ষ নিৰিখ
ঋষিক কৰে সন্ধান।
নজানি ঈশ্বৰ ভাৱক মদনে
প্ৰহাৰে কুসুম বাণ॥২৪৭
⸻⸻
দেখিয়া ইন্দ্ৰৰ মায়া মহাঋষি নাৰায়ণে
নকৰিলা কটাক্ষো কিঞ্চিত।
থাকিলন্ত ধৈৰ্য্য ধৰি যেন মহা মেৰুগিৰি
তপত নিবিড় কৰি চিত্ত॥
দেখি পাছে দেৱ গণ ভৈলন্ত ব্যাকুল মন
হিয়াত মিলিল মহাত্ৰাস।
স্থিৰ নোহে হাত ভৰি কম্পে তনু তৰ তৰি
ঋষি শাপে হৈবে সৰ্ব্বনাশ॥২৪৮
পাছে প্ৰভু নাৰায়ণ দেখন্ত দেৱতা গণ
মৰে যেন ভয়ত সমূলি।
হাসিয়া লগাইলা মাত নিষেধন্ত তুলি হাত
নকৰা নকৰা ভয় বুলি॥
