এই পৃষ্ঠাটোৰ বৈধকৰণ হৈছে
৫৫
নৱসিদ্ধ সংবাদ
ত্ৰৈলোক্য সম্পদ লৈবে লাগি ঋষি
কৰে হেন তপ ঘোৰ।
জানিলো দুৰ্জ্জয় ঋষিৰ নিদানে
সৰ্ব্বনাশ হৈবে মোৰ॥২৪৪
কৰিল আদেশ মদনক চাই
চলিয়ো তুমি অনঙ্গ।
নৰ-নাৰায়ণ ঋষিৰ তপস্যা
সত্ত্বৰে কৰিয়ো ভঙ্গ॥
মলয় পৱন কোকিল বসন্ত
আমাক তুমি উদ্ধাৰা।
মদনৰ সঙ্গে চলিয়ো সত্ত্বৰে
যত আছা অপেস্বৰা॥২৪৫
ইন্দ্ৰৰ আদেশে মদন লৰিলা
লৈয়া নিজ পৰিবাৰ।
যত অপেস্বৰী লড়িলা প্ৰৱন্ধে
পিন্ধি দিব্য অলঙ্কাৰ॥
ঋষিৰ সমীপে পাতিলন্ত নৃত্য
পৰম ৰঙ্গে অনঙ্গ।
সুললিত গীত গাৱে বিদ্যাধৰে
গন্ধৰ্ব্বে ঠুঙ্কে মৃদঙ্গ॥২৪৬
বহে মন্দ বায়ু বসন্ত মিলিল
কোকিলৰ কুহু নাদ।
