এই পৃষ্ঠাটোৰ বৈধকৰণ হৈছে
৯২
নিবেদন।
পাহাৰে পব্বতে গায় সুমধুৰ গান,
ভৈয়ামে নিৰলে তাত পাতি থাকে কাণ,
আহাঁ বুলি ভাবি থাকোঁ
তোমালৈ চাই থাকোঁ
তোমাৰ চৰণ ধূলি দিবা বুলি দান।
বতাহে সাবটি চুমা সকলোকে খায়
সুগন্ধি ফুলৰ গাত সাঁচ বহি যায়,
পুৱা আৰু গধূলিত
জুৰ লগা বতাহত
গোন্ধৰ আমোল-মোলে জীৱন জুৰায়।
সজোৱাঁ জগত খনি তোমাৰ হাতেৰে,
হৃদয় উপচি যক তোমাৰ চুমাৰে,
সজোৱা জগত খনি
কবিতাৰ কৰা ৰাণী
ওপচক দেশ খনি ভৰি কবিতাৰে।
⸻
সন্ধ্যাদেবী।
সুলক্ষণা সন্ধ্যাদেবি, তোমাৰ কাণত
মানুহৰ গীত শুনি ভাল লাগে জানো?
শুনা গীত তুমি ধুমুহাত,
সৰু জুৰি বৈ থকা পৰ্ব্বতৰ গাত।
