এই পৃষ্ঠাটোৰ বৈধকৰণ হৈছে
৩০
নিবেদন।
দুটামানে মিলি কিয়নো বেলেগে
বিভুৰ মহিমা গোৱা,
নিজৰ ভাষাত বিভুৰ কৰুণা
কিয়নো মুখেৰে কোৱা?
সকলোৱে গোৱা সকলোৰে বুজা
বাজিছে প্ৰাৰ্থনা গীত,
মিলি যোৱা তুমি তাৰ লগে লগে
সমৰ্পা আপোন চিত।
⸻
ৰাজ-সভা।
একো শিকা নাই শিকিব লগীয়া
আছে বহু কথা মোৰ;
গোটেই জীৱন থাকিলেও শিকি
শিকাৰ নপৰে ওৰ।
ভাবি যদি চাওঁ অলপো নেদেখোঁ
হিয়াৰ চাকিত তেল,
নিদিয়ে সোমাব, কিহেৰে পাতিম
ৰজাৰ সভাত মেল?
