এই পৃষ্ঠাটোৰ বৈধকৰণ হৈছে
৮৪
দেৱজিত।
বৈশম্পায়ন বদতি শুনিযো জন্মিজয়।
সেই বেলা আগে পাচে ধাইলা দেৱচয়॥
চৌভিতি বেঢ়িয়া অৰ্জ্জুনক দেৱগণ।
কৰিবে লাগিলা সবে শৰৰ সন্ধান॥৩৯৮
অৰ্দ্ধচন্দ্ৰ নৰাচ বিপাট কনিয়াল।
ভল্ল ভিৰিপাল প্ৰহাৰয় দিগপাল॥
সুৰপতি বশ্য দন্ত ভিণ্ডি দিব্য শৰ।
সৰ্পমুখ ত্ৰিকন্তিকা মাৰে নিৰন্তৰ॥৩৯৯
আৰু দেৱ প্ৰহাৰ কৰিলা শৰ যত।
দিবসতে ৰাত্ৰি ভৈলা দেখি সেই মত॥
হেন দেখি অৰ্জ্জুনৰ ক্ৰোধ গৈলা চৰি।
বাম হাতে শাৰঙ্গ ধনুক বীৰে ধৰি॥৪০০
শৰ ধনুক বীৰে টঙ্কাৰ কৰিলা।
চৈধ্যয় ভুবন খান গিৰিসই লৰিলা॥
প্ৰচণ্ড নাদত শব্দ উঠিলেক অতি।
কম্পিবে লাগিলা ব্ৰহ্মা দেৱ পশুপতি॥৪০১
শব্দৰ যে ৰোলে মহা স্বৰ্গ কোল পূৰি।
কম্পিবে লাগিলা সসাগৰা বসুন্ধৰী।
তাৰ প্ৰতিধ্বনি সাগৰত ভৈলা ঢউ।
আকাশ লঙ্ঘিয়া সাগৰত ভৈলা ঢউ॥৪০২
পাচে প্ৰতিধ্বনি দেৱতাক গৈলা ধাই।
দেৱতাৰ কৰ্ণে তাল হানিলেক যাই॥
