এই পৃষ্ঠাটোৰ বৈধকৰণ হৈছে
দীপ্তি
পাতত বহিও জাতৰ বতৰা,
সৰু-বৰ বাছি কিয়বা আঁতৰা?
মাতৃৰ যজ্ঞত আপোন পাহৰাঁ,
যাব সঙ্কীৰ্ণতা আঁতৰি।
মাতৃ-মন্দিৰত সকলোৱে মিলি,
ভাই-ভনী বুলি কৰাঁ কোলাকুলি,
গুচোৱাঁ মনৰ কপটতা-মলি,
যোৱাঁ অহমিকা পাহৰি।
তেতিয়া হে আয়ে লব অৰ্ঘ্য তুলি,
দিব আশীৰ্ব্বাদ সুসন্তান বুলি,
তেতিয়া তুলিবা প্ৰাণ-মন খুলি
জাতীয় প্ৰীতিৰ লহৰী।
তেতিয়া গীতত পানী হ'ব শিল,
ঢৌৱে ঢৌৱে তাৰ কঁপিব নিখিল,
স্বৰগ-মৰত হ'ব দুয়ো মিল,
হাঁহিব জননী সাদৰী।
মৃদু সমীৰণে শুভ সমাচাৰ
দিগ্দিগন্তত কৰিব প্ৰচাৰ,
নতুন প্ৰভাত উদিব আমাৰ,
পুণ্য কিৰণ বিতৰি।
⸻
