এই পৃষ্ঠাটোৰ বৈধকৰণ হৈছে
১৬
জনকাব্য়
সেউতী এপাহি, মালতী এপাহি,
কেতেকীৰ ঠোৰালি পাহি।
তোমাৰে দেহাটি পদুমৰ পাহি যেন
মাণিকি-মধুৰি হাঁহি॥৭৬।
তোক চাই ৰাঙলী, বান্ধি যাওঁ দাঙৰি,
নড়া চাই চপাই যাওঁ নাও।
বুকু চমচমায়, দেহা টনটনায়,
তোমাক কাহানিকৈ পাওঁ॥৭৭।
দেখিবলৈ শুৱনী ক’লাকৈ জাৰণি,
চিৰিলি চিৰিলি পাত৷
তাতোকৈ শুৱনী চেনাইৰে দুখনি
কোমল কুমলীয়া হাত॥৭৮।
দিখৌ নৈৰ পাৰতে কলপাত কাটিলোঁ
আগলি আগলি চাই।
বিহুৰ তলীতে তোমাক বাচি লৈছিলোঁ
ককাল-খামুচীয়া চাই॥৭৯।
গা কিনো চাবা মালি মাছ যেনে,
কঁকালটি বীণৰে নলা।
মুখ কিনো চাবা পূৰ্ণিমাৰ জোন যেন,
চকু সৰগৰে তৰা॥৮০৷