এই পৃষ্ঠাটোৰ বৈধকৰণ হৈছে
( ৩৬ )
বিশ্বৰ সকলো ভাই-ভনী তাৰ,
সুখৰ নপৰে ওৰ।
———
মেঘ।
(কবি Shelley-ৰ “The Cloud” নামে ইংৰাজী কবিতাৰ ছা লৈ লিখা হৈছে। )
পৃথিবী জনমভূমি পানীৰ তনয়,
পাখি নাই উৰি ফুৰোঁ আকাশত মই।
জীৱন-উপায় কৃষি হয় মোৰ পৰা,
সুজলা সুফলা মই কৰোঁ এই ধৰা।
পিয়াহত ফুল যায় ক্ষীণাই শুকাই,
নতুন জীৱন দিওঁ পানী কঢ়িয়াই।
ৰদৰ তাপত যত কুঁহি ফুল পাত,
কলা ঘুমটিৰে শোৱে জাপি ধৰোঁ গাত।
ফুল-কলি হালিজুলি নাচে বতাহত,
ময়ে তাক হঁহুৱাও মাকৰ বুকত।
ৰঙ্গা মুখে উষা দেবী পূব আকাশত,
দিনৰ উদয়-বাৰ্ত্তা জনায় লোকত;