এই পৃষ্ঠাটোৰ বৈধকৰণ হৈছে
৩০১
গদাধৰ।
তেজেৰে ৰাঙ্গলি কৰি এই তৰোৱাল।
বাজ শিঙ্গা, বাজ ভেৰি, বাজ ঢাক্-ঢোল,
বাজ আৰু ৰণবাদ্য, যাৰ হাতে যিবা;
বাজোক সকলে মিলি একে উছাহত,
নাচোক হৃদয় মোৰ ৰণ ৰহস্যত,
উঠোক উতলি বীৰতেজ। (ৰণবাদ্য বাজে।)
পাঃ ফুঃ।— জয় গদাপাণি জয়!
সেনাদল।— জয় ভাবীৰাজ জয়!
গদা।— নাচিছে হৃদয় ঘনে,
নাচে মোৰ তেজৰাশি সিৰে সিৰে বই;
ৰণমদে মতলীয়া হইছে পৰাণ।
সিদ্ধি হব আজি মোৰ গুপুত বাসনা;
মিলিছে সুযোগ, সংযত বাহুবল
বিকাশৰ হেতু। ভাগ্যধৰ আজি মই,
ভাগ্য মোৰ আজি হেন দিনে। ধন্যবাদ
ডাঙ্গৰীয়া! ৰাজখোৱা! পানী-ফুকনক!
ধন্য সেনাগণ।
বঃ ফুঃ।— ধন্য বীৰ গদাপাণি!
ধন্য বীৰবাহু! ভাগ্যবলে পালোঁ অজি,
তোমাহেন যোগ্যজন ৰাজপাটলই,-
শান্তিৰক্ষা হেতু।— শান্তিৰক্ষা কৰা আজি
তোমাৰ প্ৰথম কাম। শলাগোঁ তোমাৰ
অসম বীৰৰ তেজ,—জিনিবাঁ ৰণত।
কিন্তু, বীৰবাহো! ৰাখাঁ এটি অনুৰোধ,
