এই পৃষ্ঠাটোৰ বৈধকৰণ হৈছে
ষষ্ঠ দৃশ্য
যমুনাৰ পাৰ
(লাহে লাহে বাঁহী বজাই কৃষ্ণ বহি আছে। এজাক গোপিনীৰ প্ৰবেশ
গোপিনীয়ে স্তুতি কৰে)
স্তুতি⸺ প্ৰিয়তম আত্মা সুহৃদ সোদৰ
প্ৰাণ প্ৰিয়তম পতি
পিতা জগতৰ হে প্ৰাণপ্ৰিয়
জীৱনে মৰণে গতি
ভকতি কুসুমে ৰাজীব চৰণ
বাজিম হিয়াৰ তেজে
হৃদি সিংহাসন পৰিপূৰ্ণি তাতে
তোমাৰ চৰণ বাজে
কোটি জনমৰ কোটি সাধনাৰ
কোটি তপস্যাৰ সিদ্ধি
তুমি ময় প্ৰাণ নাই আৰু আন
গোপিনীৰ প্ৰাণনিধি
(শ্ৰীকৃষ্ণই লাহে লাহে গীত গায় )
গীত
মধুযামিনী সুখময়ী নিশা
মধুৰ মলয় বয়
মধুৰ গীতৰ মোহন লহৰী
যমুনা উজাই যায়