এই পৃষ্ঠাটোৰ বৈধকৰণ হৈছে
৯২
কুমৰ-হৰণ
সামে অৰ্দ্ধচন্দ্ৰ শৰ কৰিলা সন্ধান।
গণেশৰ হাতৰ কাটিলা ধনুখান॥
ধনু ছেদি সাম গৈলা লৱৰ মাৰিয়া।
মুষিকৰ নমাইলন্ত চৰণে ধৰিয়া॥
ডিঙ্গা নাৱখান যেন আনিলা ঘসাই।
হেন দেখি বাণসুত কুম্ভ গৈলা ধাই॥
কুম্ভ আসিবাৰ দেখি গণেশক এড়ি।
কৰে গদা ধৰি বিপৰীত দিলা গেৰি॥
সাম্বৰ আটাসে পুৰিলেক দিশপাশ।
বাণ কটকৰ বৰ লাগিল তৰাস॥
আথেবেথে গণপতি মুষিকত চড়ি।
ভয় হুয়া পলাইলা সমৰ ভূমি এৰি॥
কুম্ভক কৰিল সাম্বে গদাৰ প্ৰহাৰ।
বাণসুত কুম্ভ গৈল যমৰ দুৱাৰ॥
কুম্ভ পৰিবাৰ দেখি যত ভাই আছে।
একেবাৰে সাম্বক বেঢ়িলে আগে পাছে॥
হেন দেখি সাম্ব ধাইল কৰে গদা ধৰি।
মৃগযূথ লাগি যেন প্ৰমত্ত কেশৰী॥
এক এক গদাকোবে কৃষ্ণৰ কুমাৰ।
মুহূৰ্ত্তেকে সবাকো পেষিলা যমদ্বাৰ॥
