এই পৃষ্ঠাটোৰ বৈধকৰণ হৈছে
উপৰে হাতীয়াৰে খুম্পি যাই।
ধৰিলে শুণ্ডত মাধৱে পাই॥
প্ৰমত্ত সিংহে যেন লীলা কৰি।
পাৰিল হস্তীক ভূমিত হৰি॥
পাৱে ভিৰি তাক কৰি আক্ৰান্ত।
লৈলন্ত উপাৰি হস্তীৰ দন্ত॥
হস্তী হস্তীয়াৰ দুইকো জপাই।
মাৰিলন্ত গজদন্তে কোবাই॥
মৰা কুবলয় পীড়ক এৰি।
পশিল ৰঙ্গশাল দেৱ হৰি॥
চৌপাশে গোপগণে বেঢ়ি যান্ত।
দুভাইৰ কান্ধত হস্তীৰ দন্ত॥
প্ৰকাশে কৃষ্ণৰ মুখ কমল।
দেখিয় তাতে ঘৰ্ম্মবিন্দু জল॥
ৰুধিৰ ছিটা তাৰ মাজে মাজে।
পদপঙ্কজত নূপুৰ বাজে॥
শ্যামল তনু তাতে পীত বাস।
কমল লোচন নুগুচে হাস॥
