এই পৃষ্ঠাটোৰ বৈধকৰণ হৈছে
কুটিল অলকা বান্ধিল তুলি।
মাতিল শুনৰে অম্বষ্ঠ বুলি॥
যাইবোঁ ৰঙ্গশাল সত্বৰ কৰি।
পথ ছাৰি দেহ ঐৰ অন্তৰি॥
বাট নেদ যদি শুন দ্বন্দুৰ।
কুঞ্জৰ সমে নিবোঁ যমপুৰ॥
হেন শুনি পাছে অম্বষ্ঠ ৰাগি।
খুম্পিল হস্তীক কৃষ্ণক লাগি॥
ধায় গৈল হস্তী কালান্ত প্ৰায়।
ধৰিতে কৃষ্ণক শুণ্ডে মেৰাই॥
এৰাইল আছোট কৰিয়া উঠি।
মাতঙ্গক কৃষ্ণে মাৰিয়া মুঠি॥
ভৰিৰ মাজত লুকাইল তাৰ।
ক্ৰোধিল কুঞ্জৰে পায়া প্ৰহাৰ॥
নেদেখি সিটো ফোপায় যেন নাগ।
শুঙ্গি শুঙ্গি পাইলে কৃষ্ণক লাগ॥
ধৰিলে কৃষ্ণক শুণ্ডে মেৰাই।
বাজ ভৈল কৃষ্ণে বলে এৰাই॥
