এই পৃষ্ঠাটোৰ বৈধকৰণ হৈছে
পাদ্য অৰ্ঘ্য গন্ধ ধূপ লগাই।
কৰিল পূজা লৈল দুয়ো ভাই॥
ভূমিত পৰি বোলে মালাকাৰ।
পিতৃ দেৱ ঋষি তুষ্ট আমাৰ॥
আজিসে জন্ম সাম্ফলিলোঁ আমি।
কুলকো পবিত্ৰ কৰিলা স্বামী॥
জগতৰে মুখ্য কাৰণ হুই।
ভৈলা অৱতাৰ তোমৰা দুই॥
ভকত জনৰ ৰক্ষাৰ হেতু।
দুষ্টক নাশাহা গৰুড়কেতু॥
জগতৰে আত্মা ঈশ্বৰ দেৱ।
তোমাৰ শত্ৰু মিত্ৰ নাহি কেৱ॥
সমস্ত ভুততে আছা বিয়াপি।
ভজন্তাক প্ৰভু ভজা তথাপি॥
কৰিয়ো আজ্ঞা আমি তযু ভৃত্য।
তোমৰা দুইৰো কৰোঁ কিবা কৃত্য॥
যাক পাঞ্ছা তুমি কাৰ্যক লাগি।
প্ৰসাদ পাইবে সেহি মহাভাগী॥
