এই পৃষ্ঠাটোৰ বৈধকৰণ হৈছে
ঘোষা॥ প্ৰাণ বান্ধৱ মাধৱ ৰাম।
দেহু দেখা হৰি কৰোঁ প্ৰণাম॥
পথত ৰাম কৃষ্ণ মহাভাগ।
যাহান্তে ধোবাক পাইলন্ত লাগ॥
খুজিলন্ত বস্ত্ৰ মাতি ধোবাক।
দিয়ো ভাল বাছি বস্ত্ৰ আমাক॥
আজি যেবে বস্ত্ৰ কৰস দান।
হৈবেক পৰম তোৰ কল্যাণ॥
এহি বুলি বস্ত্ৰ খোজন্ত হৰি।
দুৰ্ম্মুখ ধোবা মাতে ক্ৰোধ কৰি॥
কিনো মহামূঢ় তোৰা গোৱাল।
পৰ্ব্বত বনত খপস কাল॥
মৰিবাক লাগি নাহিকে ত্ৰাস।
ৰাজাৰ বস্ত্ৰক পিন্ধিবে চাস॥
প্ৰাণ লৈয়া পলা ঐৰ অন্তৰি।
ৰাজদুতে পাইলে দণ্ডিবে ধৰি॥
দৈৱকী সুতে শুনি হেন বাণী।
মাৰিলা ধোবাক চৱৰ টানি॥
