এই পৃষ্ঠাটোৰ বৈধকৰণ হৈছে
আশাৰ গীত
মই গীত এটি গাম
আজি এই সন্ধিয়া পৰত
গাইছিলো যিটি গীত উলাহেৰে
মনোৰম চৰাই পুৱাতে
কুলি কেতেকী পাহাৰী জুৰিটিৰ
সমলয় সমতানে গীত এটি গাম
সেই সুৰীয়া গীতকেই গাম।
আজি মই আকৌ গাম
দেহ মন শাঁত কৰি নিয়া
শুই থকা ফুলপাহে চকু মেলি চোৱা
নিয়ৰ সৰা কোমল পুৱাতে
সেউতী মালতী লাজুকী শেৱালিৰ
হেঁপাহৰ মৰমৰ গীত এটি গাম
সেই সুৰীয়া গীতকেই গাম।
মই চিৰদিনে সেই গীত গাম
বিদায়ী কুলি বিৰহী কেতেকীৰ
হাঁহি ভৰা সঁহাৰি পাম
হালি জালি নাচতেই বিভোৰ ফুলটি
দুনয়ন ভৰি চাম
মই এটি আশাৰ গীত গাম
জীৱনৰ ৰং ভৰা গীতকেই গাম। ❖
এজন ডাক্তৰৰ কবিতা • ৬৭
