এই পৃষ্ঠাটোৰ মুদ্ৰণ সংশোধন কৰা হৈছে
১৫৪
অসম-সন্ধ্যা
ৰজাক বঢ়ালে আগ নিলগৰ পৰা
ৰজাই সঘনে বাদ্য, কৰি জয়ধ্বনি।
ৰজাক আদৰি আনি, ল’ই সম্মুখত,
প্ৰবেশিল আলুংমিঙ্গি ৰাজ নগৰত।
গোটাই নগৰবাসী, পুৰণি বিষয়া,
পাতি মহোৎসৱ, থাপি ৰজাক পাটত
পুনৰায়, ব্ৰহ্মৰাজ-প্ৰতিনিধিৰূপে।
জনালে ৰজাক সেৱা আলুংমিঙ্গিয়ে।
চন্দ্ৰকান্তে লভি ব্ৰহ্মৰাজৰ কৃপাত,
নিজৰ হেৰোৱা ৰাজ্য, ৰাজসিংহাসন,
ল’লে ঠাই পুনৰ্ব্বাৰ নিজ ভবনত।
বছি ল’ই মনোমত নতুন বিষয়া,
পুনৰ ধৰিলে গুৰি শাসন-তৰীৰ।
ইফালে নাৱেৰে গ’ই গুৱাহাটী পাই,
ৰুচিনাথ বজ্ৰনাথে আলচি বিস্তৰ,
কৰিলে যোগাৰ তাত নতুন যুদ্ধৰ,
গোটাই নিপুণ সেনা দেশ-বিদেশৰ।
ৰণৰ আহিলা-পাতি ভোজন-সম্বল
কৰিলে যুগুত কৰি শ্ৰম, অৰ্থব্যয়।
প্ৰথম আহোঁতে মান হ’ই সেনাপতি
যি জনে সংগ্ৰাম কৰি মানৰ লগত
বন্দী হই ভুঞ্জিছিল অশেষ লাঞ্ছনা,
সেই গগৈয়েই আজি ভাগ্যৰ বলত
কৰিছে বিষয় ভোগ বৰফুকনৰ।
