এই পৃষ্ঠাটোৰ বৈধকৰণ হৈছে
পঞ্চম জৰ্জ্জৰ ৰাজ্য অভিষেক
মঙ্গল দুন্দুভি বাজিছে ঘনাই
সুমেৰু কুমেৰু জুৰি।
আনন্দে মগন বিশ্ববাসীগণ
উজ্জ্বল ইংলণ্ডপুৰী॥
বৃটিচ ৰাজ্যৰ সকলো জাতিয়ে
গাইছে সম্ৰাট জয়।
ৰজা লাখপতি বাটৰ ভিখাৰী
সকলো আনন্দময়॥
ডালে ডালে পৰি বিনন্দিয়া পখী
গাইছে সুৱদী গান।
ৰাজ অভিষেক জনাবৰ গুণে
আনন্দে ধৰিছে তান॥
“ৱেষ্ট মিনষ্টাৰ” ধৰ্ম্ম মন্দিৰত
ৰজাৰাণী অভিষেক।
কত “আৰ্চবিশপ” আৰু পুৰোহিত
নাই তাৰ আদি লেখ॥
ধৰ্ম্ম মন্দিৰৰ পশ্চিম প্ৰাঙ্গনে
এটি শোভা যাত্ৰী দল।
ৰজা আৰু ৰাণী নহালৈকে সবে
অপেক্ষা কৰিয়ে ৰল॥
