এই পৃষ্ঠাটোৰ বৈধকৰণ হৈছে
৪০
অঞ্জলি
সদাই সন্তোষ তুমি লোকৰ মনত দিলা,
দিলা মোক সদাই বেজাৰ;
কেনেনো বিলাই মোৰ হ’ব তুমি অবিহনে,
নেভাবিলা কিয়নো এবাৰ?
সংসাৰ-দুখৰ বোজা এনেয়ে নোৱাৰি ব’ব
তাতে মোৰ এয়ো এটা হ’ল;
হিয়াৰ ডাঙৰ দুখ নোৱাৰোঁ ফুটাই কব
যত কথা হিয়াতেই ৰ'ল।
কত আশা কৰিছিলোঁ একেলগে দুয়ো বহি
মনৰ সকলো কথা ক’ম,-
বুজিব নোৱাৰা ভাব সকলো আছিলোঁ সহি
ভাবিছিলোঁ বুজোৱাই ল’ম।
তোমাৰ কথাই মোক থাকোঁ মানে জগতত
আন একো ভাবিব নিদিব,
ভাল কিবা দেখিলেও মোৰ শুদা হৃদয়ত
একো আৰু ভাল নেলাগিব।
