এই পৃষ্ঠাটোৰ বৈধকৰণ হৈছে
দ্বিতীয় খণ্ড
নাম-অপৰাধ
প্ৰথম কীৰ্ত্তন
ঘোষা॥ কৰিয়ো হৰিৰ চৰণে ৰতি৷
কলিত হৰিৰ নামেসে গতি॥ ১
পদ॥ পদ্ম-পুৰাণৰ স্বৰ্গ-খণ্ডত।
নিৰূপি আছে কলি-ধৰ্ম্ম যত॥
তাক শুনা আৱে একান্ত চিতে।
যাৰ ইচ্ছা আছে ভৱ তৰিতে॥ ১
আছে চাৰি সিদ্ধ জ্ঞানী পৰম।
ব্ৰহ্মাৰ চাৰিও পুত্ৰ প্ৰথম॥
তাসম্বাক পায়া নাৰদ ঋষি।
পুছিলা সংশয় কথা হৰিষি॥ ২
ঈশ্বৰ ভগৱন্ত কৃপাময়।
কহিছা যিটো মহা পাপচয়॥
কেনমতে হোৱে বিনাশ তাৰ।
কলিত কোন পুণ্যে পাই পাৰ॥ ৩
