পৃষ্ঠা:Kirtan Ghosha.pdf/১৮৪

এই পৃষ্ঠাটোৰ বৈধকৰণ হৈছে

নৱম খণ্ড
বলি-ছলন
প্ৰথম কীৰ্ত্তন

ঘোষা॥বোলা ৰাম ৰাম ভাবিয়ো ৰাম ৰাম।
 পৰম মধুৰ বাণী লৈতে অনুপাম॥১
পদ॥ শুক মুনি বোলন্ত শুনিয়ো পৰীক্ষিত।
 বামনৰ বাক্যে বলি সুতল-পুৰীত॥
 নিয়মিলা দানৱক বিষ্ণু-ধৰ্ম্ম কই।
 আপুনি থাকিলা পাছে মুখ্য গৃহ লই॥ ১
 দিব্য ভোগ যতেক আপুনি লৱে লাগ।
 বৈষ্ণৱ বলিৰ তাত নাহি অনুৰাগ॥
 এড়িলা বিষয়-ভোগ প্ৰহ্ৰাদৰ নাতি।
 সদায় থাকন্ত দিব্য সভা এক পাতি॥ ২
 মাধৱৰ চক্ৰে আসি ভৈল সভাসদ।
 যাহাৰ ভয়ত দৈত্যগণ নিশবদ॥
 প্ৰহ্ৰাদে কহন্তে শুনি থাকে কৃষ্ণ কথা।
 দ্বাৰত আপুনি হৰি থাকন্ত সৰ্ব্বথা॥ ৩