এই পৃষ্ঠাটোৰ বৈধকৰণ হৈছে
এইদৰে ১৭৯৫ শকত দন্দুৱা-দ্ৰোহৰ ওৰ পৰিল। এই দ্ৰোহ দমন কৰাৰ বাবে বৰফুকনে ৰজাৰ পৰা শলাগনি পালে। বৰফুকনে হৰদত্তক বেয়া বুজাবলৈ তেওঁৰ শত্ৰু পক্ষৰ হতুৱাই এনেবিলাক গীত বচাই গোৱাইছিল।
১।
হৰদত্তৰ বাৰিতে বৰ বৰ বাঁহ
ঠনৰাই পৰি ৰল হৰদত্তৰ হাঁহ
বাছা! কিয়লৈ বৰুৱা হলি।
২।
হৰদত্তৰ বাৰিতে বৰ বৰ ইৰি
ঠনৰাই পৰি ৰল হৰদত্তৰ তিৰী
বাছা! কিয়লৈ বৰুৱা হলি।
৩।
হৰদত্তৰ জীয়াৰী পদ্মকুমাৰী
ধনৰাত নাখালে ভাত
হাতত ধৰি নি উমাদত বঙালে
পদ্ম বিচাৰে গাত।
